[walaa farouk]

الكلمة دي بقينا بنسمعها كتير الأيام دي.
بدأنا نفهمها ونراجع مواقف طفولتنا
وحياتنا بناءاً على اللي بنسمعه..
وتلاقي مشاهد أنت فيها ضحية.. ومشاهد حصل قدامك فيها تنمر على حد.
وساعات يعني بتكون انت الشخص المتنمر.
الحقيقة.. الكلمة معبرة قوي عن اللي بيحصل.
التنمر.. جت من النمر.. من طبيعته وصفاته.
النمر أشكال وأنواع وسلالات.. والمتنمرين فيهم شباب واطفال.
اولياء امور ومدرسين.. وناس بتعاكس في الشارع.
كمان النمر بيبقاله منطقة نفوذه.. وعادة المتنمر بيبقى بطل رياضي مثلاً
او شاب روش في شلة أو بنت امورة في الفصل.
حتة كده عارف إنها منطقته.. ويعرف يتريق على الناس فيها ومحدش يرد عليه.
مش بس كده.. النمر فريسته بتبقى أي حجم
من أول القوارض الصغيرة لحد الغزلان.
فممكن قوي المتنمر يتنمر على شخص اشطر منه أو اقوي منه
بس بيمسك في أي حتة ضعيفة..
النمر إنتهازي في الصيد والإفتراس.ز بيعرف يلاقي اللحظة والفرصة
اللي يتنمر بيها على حد قدام الناس.
النمر كمان بيخنق الفريسة وبعدين ياكلها.
هو حرفيا بيخنق عليك.. يخليك مش شايف مميزاتك.
من هنا بقى اعتقد تقدر تشوف سمات المتنمر.
طريقته وشخصيته و انتهازه للفرص.
اعتقد.. كلنا اتعرضنا للتنمر في وقت ما
و ده مش لعيوب معينة فينا.. الموضوع أكتر ليه علاقه بالمتنمر.
بس الخبر الحلو.. إن النمر بيفشل في ٩٠٪؜ من محاولات الصيد.
تقدر ماتكونش فريسة للمتنمر وتمنع كلامه انه يخنق مميزاتك .
بلاش تعيش ضحية.. وقف ده واخرج من دايرة نفوذه.
اما بقى لو أنت متنمر.. أعرف إن التنمر ده مابيثبتش أي تفوق
و إن الناس بتخاف منك أكتر من كونها بتحبك ومش عارفه تتطمنلك.
ولو أنت شاهد على تنمر خليك إيجابي
وقفه وقدام كل كلمه وحشه.. قول كلمة تشجيع