[walaa farouk]

تخيل إنك طلبت من حد خدمة
وقالك معلش أنا مش فاضي دلوقتي تعالى بكرة،
وفعلا روحتله بكرة وقالك معلش
في حد أهم منك النهاردة تعالى بكرة..
وروحتله تاني يوم وقالك معلش
ماليش مزاج النهاردة ..تعالى وقت تانى ..
لغاية امتى هتفضل تروحله وتطلب منه حاجة !؟
وبعد كام مرة هتفقد الأمل في مساعدته ليك؟ ..
يمكن 3 او 10 او حتى 20 مرة
في قصة غريبة لشخص عاش في زمن المسيح
كان مشلول وكان في بركة مياه كان بيجى ملاك يحركها كل يوم
واول واحد ينط فيها كان بيخف من أي مرض عنده،
والراجل المشلول ده كان نفسه حد يعمله الخدمة دي
ويزقه في المياة.. لكن للأسف كل يوم كان يروح عند البركة
مستني حد يساعده.. لكن دايمًا كان بيكون ناس أهم منه وأسرع منه
أو حتى محدش عايز يساعده للاسف
وعدى الوقت وهو بيشوف الناس العيانة قدام عينيه تيجي
وتنط في البركة وتخف من تعبها وهو زي ما هو لمدة 38 سنة،
متخيل؟!! .. كل الوقت ده كان كفيل إنه
مش بس يُفقده الأمل فى إن حد يساعده ، لكن كمان يفقده أصلا
الرغبة في الشفاء.. لكن عدى عليه المسيح
وسأله سؤال غريب جداً ( انت عايز تخف؟ ) .. ايه يعنى عايز يخف !!
الحقيقة إن المسيح كان حاسس كويس بالحالة اللي وصلها
من فقدان الأمل والرجاء والأسوء هو فقدان الرغبة !!
و دي اللي كان عايز يصحيها فيه من تاني
المسيح لما سأله السؤال ده.. وكأنه عايز يقوله ..
يلا من حقك تاني تعلن عن رغبتك وإحتياجك
لإني حاسس بيك وشايفك مهم وعايز أساعدك !
وفعلاً.. شفاه المسيح حتى بطريقة غير اللي كان مستنيها
ومن كتر ما كان فرحان حكى لكل اللي يعرفهم
لغاية ما الموضوع وصل لرؤساء كهنة اليهود !
صدق إن الله بنفسه يقدر يرجعلك الأمل والرجاء من تاني
في حاجة فقدت فيها الأمل.. ويقدر يحيي رغبتك من تاني
وإرادتك ويساعدك حتى بطرق مش متوقعة!