[Mary Naeem]

في الكام يوم الي فاتوا شفنا كل شئ وعكسه






شفنا اب ساب بنته الصغيرة علي الأرض تعيط وخاف يشيلها علشان عرف انها مُصابة بالكورونا ، وشفت زوج لما عرف ان مراته مُصابه خدها في حضنه وقالها مش اتفقنا نتقاسم كل حاجة لأخر العمر
شفنا راجل كبير في السن عندة 90 سنة وخف الحمد لله تماما" وبقي زي الفل وشفنا شاب عنده 39 سنة للأسف ماتلحقش!!!
شفنا ناس محترمة جدا" جدا" الحال ضاق بيها فجأة ومابقاش فيه في بيوتها حق العيش حرفيا" وشفنا تُجار عملوا ملايين من تغلية أسعار وتخزين سلع...
شفت حد سليم وزي الفل بيقول للصيدلي هات 10 علب علشان يبقوا عندي إحتياطي وشفت واحدة تعبانة ياعيني جدا"بتقول للصيدلي إديني علبة واحدة بس ولو ربنا ما منش عليا بالشفا اجي اخد منك تاني علشان غيري يستفاد ...
شفت أصناف وألوان من البشر...
كلهم بشر ، خلقة ربنا ، عندهم نفس الجسم ونفس الهيئة ولكن ماعندهومش نفس ( القلب)...
سبحان الله ربنا خلقنا وأحسن تصويرنا لكن سابلنا القلوب إحنا نشكّلها...
والي ينجح في امتحان الدنيا ده الي قدر يحافظ علي قلبه سليم لحد نهاية الرحلة!!
كان فيه زمان فيلم اسمه الإختيار ،
كان فيه مشهد عمري ماهانساه ابدا"
للفنان عزت العلايلي بيقول فيه..
( تفتكر الإنسان بيقابل مين في اخر رحلته....
الشيطان ؟! أخطر الإنسان بيقابل نفسه)...
في أخر الرحلة هانقف في مواجهه نفسنا تماما"
بدون أي رتوش..
هانقف في مواجهه أطماعنا وتصرفاتنا
ومواقفنا ومشاعرنا وكل حاجة عملناها في الدنيا ديه..
تفتكروا الدنيا تستاهل إننا نفسد قلوبنا علشانها ؟!
تفتكروا الحياة تستاهل إننا نفقد آدميتنا علشانها ؟!
قلوبنا هي سر النجاه
لو حافظنا عليها وعلي بشريتها وإنسانيتها
صدقوني لننجو ،وننجو بمنتهي البساطة..
علشان كدة حافظوا علي الحتة الصغيرة الي جواكم
لأن فيها يكمن سر النجاة..