[walaa farouk]

كل ما احس بنفور من المنظومة الدينية والمتدينين وتعصبهم وجمود تفكيرهم
ودماغي تبتدي تلاعبني انه ده تأثير الدين والدروشة
والافضل انك تكون بعيد عن كل ده وتعيش لنفسك وتنسى اي قضية او حلم عايشله،
بلاقي نفسي ببص ليسوع كدة بهدوء وبابتسامة واقوله "شكراً انك مش زيهم"..

أنا فعلاً ممتن ليسوع انه مكنش منتمي للمنظومة الدينية ولا افكارها،
مكنش تفكيره متحجر ولا شخصيته "لزجة" زي اللي بشوفهم بيتكلموا بإسمه،
ممتن ليسوع انه كان حقيقي وكان ثائر على كل كذب واستغلال ونفاق حتى بإسم الله..

ممتن ليسوع انه كان بيحب تابعيه مش بيستخدمهم،

ممتن ليه انه كان بيحترم عقول اللي معاه مش بيلغيها.

واللي رابطني بيسوع بشكل شخصي انه لو شيلت سلطانه الوهيته وصفاته كإبن الله على جنب.
. هايفضل برضو جميل كإنسان، شخص امين.. مختلف.. محترم ..
مستنير .. بيحب الناس وتوصل انه يضحي بحياته عشانهم،
كان انسان زي ما الانسان المفروض يكون. صورة اتمنى اكون شبهها ولو لمحة منها
.. صاحب ورفيق مش بس اله بعبده وانا خايف..

ممتن ليسوع انه بوجوده وحياته دافع عن الله وعن صلاحُه
حتى لو كل العقايد والافكار الدينية والمنظومات ضلّت وضللت الناس،
حتى لو كل القادة الدينيين طلعوا مستغلين وغير امناء..
هو حبيبي واقف بجرأة يدافع عن ذهني وسط اللخبطة دي ويهمسلي في روحي بكل هدوء
"سيبك من كل دول.. اتبعني انا".

عشان كدة أنا يمكن اتوه شوية بس ماتسابش منه، اتلخبط ونظري
يتشتت بس ارجع اهدا واطمن في حضنه.. اتملي كآبة وسواد بس اجي ارمي كل ده عند رجليه.
يسوع هو خط الدفاع الاخير قدام هجوم الشكوك عليا
..لا المنطق ولا المعرفة ولا الدين ولا اي حاجة تصُد قدام الضلمة اللي جوايا غيره..

طول ماهو موجود وجودي له معنى..
طول ماهو جميل في عينيا لسا فيا طاقة اعافر في وش العدمية والعبث اللي بيهاجمني
ويقنعني أن مفيش حاجة يتعاش عشانها.. لا انا عندي "لؤلؤة كثيرة الثمن" .
. يسوع.. اللي يستاهل اعيش بس اشوفه واتبعه واحب فيه الابدية كلها ..

طول ماهو حي.. أنا حي ..
وهو حي للأبد، وللأبد هياخدني اعيش معاه ويعوضني عن كل الحروب
والمعارك اللي اتجرحت فيها وانا بحاول اوصله..

#يسوع