[walaa farouk]

نظرية خادعة و خطيرة ، لما يكون اللي علي الوش جميل و بيبرق،
و اللي تحته فاسد و معطن..

و لان إللي علي الوش خدّاع ، و لان فيه ناس كتير طيبة و ساذجة و علي نياتها،
و شايفة الدنيا كلها بيضا، ياما اشتروا "اقفاص موششة " ،
لواحد ابدع في إخفاء عيوبه تحت وش الأمانة و التقوي و الصلاح ..

بيحصل كده في العلاقات علي مختلف أنواعها، العمل ،
الصداقة و الحب و حتي الخدمة .. و ياما ناس اتخدعت في ناس،
و ياما ناس خدعت ناس !!

الكلام هنا علي مرحلتين :

الاولي
خللي نيتك حلوة و جميلة ، و عامل الناس من قلب ابيض،
بس قلٍب كويس في "البيعة" قبل ما تشتري ،
و اصبر علي "رزقك" قبل ما تشيل و تمشي
، و امتحن و اصبر بس "بحرفنة " من غير ما تبين انك بتتطمن علي "معدن" اللي قدامك ..
و قبل الكل أسأل كويس حد فاهم و امين ،
و صلي أن ربنا يكشف لك المستور
، و هو ياما كشف للي بيسمعله كويس ..

التانية :
للي اشتري الوش و ما شافش اللي تحته و اتورط
.. فيه علاقات ينفع ترجع فيها من الاول ، حتي لو فيها شوية احراج أو كسوف
، بس افضل من ورطة "تتدبس" فيها العمر كله ..

بس فيه علاقات ما ينفعش نسيبها ، زي علاقات في العمل أو العيلة أو الزواج ..

هنا الحكمة مطلوبة جدا ، و المشورة اساسية و الصلاة حتمية ..

ربنا هنا له حلول سماوية ..
اللي تاعبك و ما تقدرش تغيره ممكن يغير له قلبه
، أو ممكن يغير قلبك انت علشان تستحمله و تحبه
، أو ممكن يديك حكمة توقفه عند حده و تواجهه بكل حب و حسم ..

في كل الأحوال، انك ما تشتريش قفص "من وشه"(!!) ،
احسن ألف مرة من انك تعيش كتير تحاول تغير "اللي تحت وشه" !!

.. د.مجدي إسحق