[walaa farouk]

ضهرك محني ؟؟

ايوه ضهرك محني لأنك فاهم الحب غلط ..
لان فيه فرق بين الحب وورطة الحب ، بين الحب و أزمة العشرة ..

الحب مش معناه ان واحد يستغلك ، و يورطك و يذلك ، و توافقه..

السيد المسيح حدثنا عن قصة حب بدأت بالعتاب
، و إذا لم تنجح انتهت ب "ليكن عندك كالوثني و العشار"
، يعني ابعد عنه و لا تعاشره (متي ١٨) ..

نفس المعني جه في الآية الجميلة
«فإن المعاشرات الردية تفسد الأخلاق الجيدة».
(١ كورنثوس ١٥: ٣٣)..
و طبعا ح نحب الكل بس مش ح نعاشر واحد أخلاقه ردية..

نفس الكلام في رسايل بولس ، بولس اللي ابدع في وصف المحبة في الإصحاح الخالد كورنثس الأولي ١٣ ، هو نفسه ٣ مرات يذكر كلمة "اعرض(ابعد) عنه" لما تيجي سيرة واحد متعب
و مؤذي و مصر علي عنده و شره
(راجع رومية ١٦ و تيموثاوس الثانية ٣ ، و تيطس ٣ ) ..

يبقي حب الكل ، و جاهد بكل ما تقدر علي حبهم ، لكن اول ما تبقي عشرتهم فيها ضرر أو استغلال أو إساءة
، نفس الحب بيقولك ابعد علشان ما تنزفش و تتأذي و تتعدي
و تشيل حمل يحني ضهرك ..

مش بس كده ، البعد بيردعهم و يفوقهم و يحطلهم حدود
و يبيعتلهم رسالة هامة : مش ح اسيبك تؤذيني
علشان لو سبتك ح تؤذي نفسك و تتمادي في أذية غيرك ..

هنا تيجي ٣ نقط :
الاولي اوعي تحس بضمير ذنب ، لأنك ح تحتفظ بالحب في قلبك
.. الحب معاه حسم و حدود .. و افتكر ان ربنا علمنا أن نحب الأعداء (متي ٥) مش أن "نعاشر الاعداء" ..

التانية : الحكمة مطلوبة جدا ، لأن البعد "صنعة" و "حرفة" ،
تتعمل من غير ما تقول للي قدامك انك بتنبذه أو بتطلعه من حياتك
.. لكن طبعا لو فيه مواجهة و اضطرتك الظروف
، قول بكل أدب و حكمة و حسم انكم مختلفين لكن متحابين،
و قدم المحبة و الإحسان لكن من بعيد ..

التالتة في المعاشرات القهرية زي في العيلة مع الآباء و الاخوات
، أو في الزواج بين الزوج و الزوجة الأمر يختلف ..

ده بقي اللي سماه الكتاب "نير" (راجع متي ١١ و ٢ كورنثس ٦)
، يعني إلزام و التزام مختلف تماما .
. هنا البعد بيكون "رمزي" ، يعني تخفف الاحتكاك و التداخل ،
يعني تقلل كلامك و تكتر سكوتك..
يعني لما تيجي فرصة كلام تشرح جرحك العميق بالراحة و بمواجهة ، يعني تصلي كتير و تطلب ارشاد من أب مختبر أو مرشد حكيم ..

اوعي تشيل اللي ما يقدرش عليه صهرك
، و ربنا يعينك لو شيلتك كانت غصب عنك ..