[walaa farouk]

فيه ناس لعيبة ، محترفة، تلعب بضمير الناس الحساسة ..
و لما "اللعيب" يقابل "الحساس" ، يبتدي الماتش ..

و اللي بيكسب دايما "اللعيب" ..

من اللعيبة القدام، لعيبة الفلوس الاستغلاليين ..
يقعد وراك لغاية ما ياخد منك فلوس مش من حقه، او يكسفك ترجع له فلوس دفعهالك
و خد بيها اللي هو عاوزه، و عاوز يرجع ياخدها بعد ما خد منك طلباته.
. و انت طبعا حساس بتدي من غير ما تحسب و ترجع من غير ما تفكر ..

لعيبة الخدمات نوع تاني .. يلاعبك لغاية ما ياخد منك خدمة مش من حقه ،
و لانك حساس بتديه من قلبك .. و بعدين ما يعرفكش و يتعذر
و يتمنع لو انت فكرت تطلب منه خدمة انت محتاجها جدا ..

لعيبة التدبيس و التدليس نوع تالت .. ده "مدبساتي" ،
يلبسك في اول حيطة و يورطك في مشاكل مع ناس أو في مواقف
ما لكش دعوة بيها أصلا.. و طبعا لأنك حساس بتوافق و تتزحلق
و هو اول واحد "بيخلع" و يسيبك لورطتك..

لعيبة المشاكل نوع رابع محترف : يقعد يحكي لك عن مشاكله اللي ما لهاش حل أو اللي هو مش "عاوز اصلا يحلها" !! .. يدخلك و يحشرك فيها و يشيلك الهم و الغم ، و يسيبك تفكرله و تقدم له حلول ، و يستمتع باذيتك النفسية و ترحيل و تحويل مشاعر الهم منه ليك .. و لانك حساس تقعد تحمل علي ضميرك مسؤلية واحد مش عاوز غير انه يتعبك ، و مش عاوز يتعب نفسه لا يفكر و لا يحل و لا يبل..

"اللعٌيب" عاوز اللي يواجهه و يكشفه و يكسفه و يفقسه ، و "الحساس" عاوز اللي يوعيه و يعقله و يجمد قلبه ..