[walaa farouk]

يا أخي متحبكهاش.. ماتبقاش فريسي!!!!
بعيدا في احد كنايس امريكا:

في ٢٠١٥
- يا ابونا قدسك ما ينفعش تدي البخور في القداس للتابلت
و الأيباد عشان مفيش كتاب قراءة بجد.
= يا أخي متحبكهاش.. ماتبقاش فريسي!!!!

- يا أبونا قدسك لازم تغطس الطفل بالكامل في المعمودية.
= يا أخي متحبكهاش.. ماتبقاش فريسي!!!!

في ٢٠١٦
- يا ابونا ما ينفعش قدسك تنبه على السيدات تتناول اي وقت و تخالف قرار المجمع المقدس.
= يا أخي متحبكهاش.. ماتبقاش فريسي!!!!

في ٢٠١٧
- أبونا أنا سمعت فلان بينكر جهنم و بيقول إن الجحيم حالة،
و أن الصليب حب مش فداء.
= يا أخي متحبكهاش.. ماتبقاش فريسي!!!!

في ٢٠١٨
- أبونا، فلان بيقول على إن الحية ما تكلمتش و ديه زيها زي كليلة و دمنة، و قدسك مضيت على بيان تأييد.
= حتفرق ايه اتكلمت و لا لأ، يا أخي متحبكهاش.. ماتبقاش فريسي!!!

في ٢٠٢٠
يا ابونا مش صح إن البنات الصغيرين يلبسوا تواني
و يقفوا مع الشمامسة.
= يا أخي ده مجرد كورال، متحبكهاش.. ماتبقاش فريسي!!!!

في ٢٠٢٥
- أبونا إزاي قدسك تجوز فلانة لفلان و هي مش متعمدة ارثوذكسي و لا مرشومة بالميرون، قدسك إزاي تديها سر الزيجة.
= يا أخي متحبكهاش.. ماتبقاش فريسي!!!!

في ٢٠٣٠
- أبونا إزاي قدسك تجوز فلانة لفلان و هو مش مسيحي اصلا.
= يا أخي الرجل غير المؤمن مقدس في المرأة المؤمنة، متحبكهاش.. ماتبقاش فريسي!!!!

في ٢٠٣٥
- يا أبونا ما ينفعش فلانة تقرا الأنجيل في القداس.

= مكنش في شعب كفاية، يا أخي متحبكهاش.. ماتبقاش فريسي!!!!

في ٢٠٣٧
- يا ابونا ازاي فلان يوعظ و يخدم في الكنيسة، ده بيطلع في مظاهرات دعم المثليين و عايش مع واحد صاحبه.
= يا أخي لا تدينوا، يا أخي متحبكهاش.. ماتبقاش فريسي!!!!

في ٢٠٤٠
- يا ابونا فاكر لما قلتلك زمان ما ينفعش البنات الصغيرين يلبسوا تواني، اهم كبروا و اتجوزوا و خلفوا، دلوقتي بيقودوا الزفة في الكنيسة و بيشيلوا الايقونات في الدورة و قدسك بتبخر قدامهم، ينفع كدة؟
= يا أخي متحبكهاش.. ماتبقاش فريسي!!!!

في ٢٠٤٥
- يا أبونا ما ينفعش البنات تشيل الصليب قدام قدسك في دورة البخور جوة المذبح و تقول مردات، ما ينفعش اساسا تدخل المذبح.
= ياه ده إنت عقلية قديمة، هي مش كاهن و لا بتقوم بدور الكاهن، يا أخي متحبكهاش.. ماتبقاش فريسي!!!!

في ٢٠٥٠
- يا ابونا انا حتجنن، ياريتني ما عشت لليوم اللي اشوف كنيستي بترسم أول قسيسة و اول قسيس مثليي جنسيا.
= ربنا بيقبل الجميع و بيحب الجميع، يا أخي متحبكهاش.. ماتبقاش فريسي!!!!

في ٢٠٥٥
التليفون بيرن، على الجانب الأخر جناب القسيسة و معاها ابونا ده.
- افندم؟
= أنت إزاي يا استاذ تقاطع حفيدك، هي ديه المحبة اللي علمهالك يسوع، ده حفيدك من افضل الخدام و بنفكر نرشحه للكهنوت.
- كهنووووت إزاي !!!! ايوا طبعا مقاطعه، لانه عايش مع صاحبته غير المسيحية و مخلف منها من غير جواز و لا أسرار و لا معمودية.
= اسرار و معمودية، ديه كلها رموز، يااااه ده إنت قديم قوي، يا أخي متحبكهاش.. ماتبقاش فريسي، أبقى تعالى احضر واتناول الاول قبل ما تتكلم عن ربنا!!
- ما بتناولش من إيدين قسيسة!!

يغلق الجد الهاتف في وجههم، ليعود يقرأ في الأصحاح الثامن عشر من أنجيل لوقا ليجد تلك الأية:
"وَلكِنْ مَتَى جَاءَ ابْنُ الإِنْسَانِ، أَلَعَلَّهُ يَجِدُ الإِيمَانَ عَلَى الأَرْضِ؟".

طبعا بتقولوا ده تشائم و مبالغة
، طب أطرحوا ٦٠ سنة من السنين الموجودة اعلاه و اقروا عن تطور ممارسات العبادة عند اللوثريين و الأنجليكان و إزاي في اقل من ستين سنة وصلوا لرسامة الشواذ و المرأة في الاسقفية.
اقروا التاريخ و حاولوا تطبقوا نفس التسلسل بعد طرح ٦٠ سنة على الأنجليكان و اللوثريين

بدأوا بفتح الباب فتحة صغيرة فدخلت ثعالب صغيرة مفسدة للكرم لتفتح الباب على مصراعيه للثعالب الكبيرة و للأسد الزائر الملتمس من يبتلعه، أعني ضد المسيح.
منقول

=يا أخي متحبكهاش.. ماتبقاش فريسي!!!!
- يا أخي القديس بولس أفتخر إنه فريسي ابن فريسي في دفاعه عن التقليد المُسلم.