[walaa farouk]

" ربنا بيكسر كل حاجة حوالينا علشان نتمسك بيه هو وبس "

جملة انتشرت كتير علي السوشيال ميديا واترسخت جوة اذهان الكثيرين ..
جملة مغلوطة و برفضها جدا .. بتصور الله وكأنه اله اناني بيقول للانسان لاما انا وبس ،
لاما هبوظلك واكسرلك كل حاجة في حياتك ..
عبارة بتتكتب كنتيجة ان علاقات كتير اتكسرت وحاجات كتير باظت في حياتنا
فبنرمي الكورة في ملعب ربنا ونقول اكيد هو عايزنا نتمسك بيه هو بس فبوظ كل حاجة .

في حين انك لو فتحت الكتاب المقدس هتقرا في اوله ان الله خلق لادم حواء (العلاقات)
والحيوانات والطبيعة والنباتات والطيور ..
وكانت ارادته ان تكون له علاقة مع كل دول .

خلينا نقولها بالشكل المظبوط .. الله خلق لنا العلاقات وعابزنا في علاقة حية بحاجات كتير
غيره لكن لازم نعرف ونفهم ان لو هو مش مركز العلاقات دي ..
كل حاجة هتفقد معناها وهتبوظ ومش هيكون لها طعم ..
لو الحاجة مش من ايده ومش منه ومش له في النهاية فهي مجرد تضييع وقت واستنزاف طاقة .

وخلينا نتفق لو الانسان فقد الشغف تجاه كل شئ في الحياة من علاقات
او عمل او طبيعة او الحياة عموما فده مش معناه تقوي و تمسك زائد بالله لكن فيه مشكلة مهم نواجهها .

لان طالما الله سايبنا علي الارض فارادته اننا مانتقفلش من الحياة .