[walaa farouk]

ما كانت مفتوحة.

و كنا بنقف في القداس نتكلم و نضحك ، و تتخانق علي الدكك ،
و نفتح الموبايلات نبعت رسايل لبعض و نرد علي التليفونات
و أحيانا (بجد حصل) نلعب جيمات (سامحوني مش عاوز حد يزعل مني ) ..

كانت مفتوحة و كنا واقفين بندين بعض و نشتمهم في قلوبنا
، و نهاجم بعض و نتخانق علي المناصب و المظاهر و المايك ،
و نطلع العيوب في ابونا و الشماس و الخادم ..

كانت مفتوحة و كنا واقفين لا بنسمع وعظ و لا بنفذ كلام الله ،
و أثناء كلمة الله بدل ما نطبقها علي نفسنا ، نقولها علي غيرنا ..

حتي التناول و الاعتراف باستهتار و عدم معرفة قدسية السر ..

و ياما زعلنا من اللي نبهنا علي الحشمة و قلنا عليه متخلف ،
و بدل ما اراعي قدسية بيت الله بالبس اللي انا عاوزه
، و ما اراعيش قدسية بيت الله ، و اتخانق مع اللي يقول لي ما يصحش،
و اقوله "خليك في حالك " ، انا حر ..

و ياما اهتمينا بزينة الكنيسة (و علي فكرة ده صح وقت الوفرة
و لما يكون احتياج الغلابة شبعان) ، في الوقت اللي فيه ناس مش لاقية قوت يومها ..
و كانت النتيجة أن اجمل كنائس العالم كتير منها بقي مزار ما حدش بيروحه للصلاة
، بعد ما الناس اتعثرت و بعدت بسببنا..

ما حدش عمل حساب اليوم ده اللي واقفين علي بابها نتمني نبوس ترابها ..

لكن حقك علي يا كنيستي ، و انا اول الخطاة اللي مزعلينك..

ما عدتش ازعلك تاني ابدا ..
بس سامحيني و حني علي و افتحي لي بابك ، و ما عدتش ازعلك تاني ابدا ابدا ..

راجعلك و باقول مع الابن الشاطر لله الساكن فيكي " يا أبي
،
أخطأت إلى السماء وقدامك، و لست مستحقا أن ادعي لك ابنا

اجعلني كاحد اجراك (لوقا ١٥: ١٨ و ١٩) ..

عارف انك واخدة علي خاطرك مني ..

ح اشتغل فيكي خدام ترابك اللي أغلي من الدهب ، بس سامحيني ..