[walaa farouk]

كلمة مش هنساها قالهالي راجل صنايعي بتاع محارة غلبان السنة اللي فاتت ..
طلعت اقولله بص ياعم فلان احنا لسة مبلطين جديد تحت
فخلي بالك ممكن متوقعش اسمنت وتفرش رملة تحت

قاللي كذا جملة مع بعض .. حسيته صوت ربنا لي مع ان الراجل ده مش تابعنا :

الاول قاللي : متقلقيش .. بيوت ربنا دي ذي بيوتنا هنحافظ عليها بعينينا

بعدها شاورلي على شروخ فوق في الروف ( مش تبع الجزء اللي اتفقنا عليه )
بسبب اخطاء فنية وقاللي من نفسه من غير ما اوصيه عليها :
انا بكرة هشتري شبك وهصلحلك معايا كل الشروخ دي
وهظبطلك الحيطة علشان متفتحش تاني .. قلت له ربنا يباركلك ياراجل ياطيب ..

لقيته قاللي : وكل الحيطان اللي فيها اسود ( يقصد اسمنت )
ومشوهة هنضفهالك خالص واخليهالك بيضة وبتنور
قلت له ربنا يخليك ..

طبعا اتبسطت جدا بكلامه .. لانه شاورلي علي حاجات انا مش واخدة بالي منها ..
بس هو علشان راجل امين في شغله اخد باله وبيصلح ورا غيره اللي غلط ..

ربنا بيعمل معانا كدة وبيقولنا نفس ال3 كلمات .. هتقولوا ازاي ؟

الاول بيقولنا : متقلقيش.. انا لما اشتغل في حياتك مش هبوظلك حاجة لانك بنتي ..
بالعكس هصلح كل حاجة معايا

هصلح لك الشروخ اللي انت واخدة بالك منها واللي انت مش واخدة بالك هشاورلك عليها ..
كل جرح حصل في حياتك بسبب الناس اللي حواليكي هصلحه ..
وهصلحه بطريقة جذرية بحيث ميفتحش تاني

وكمان هشيل كل الاسود .. كل الخطايا اللي مشوهة قلبك هشيلها وهرجع قلبك ابيض ومنور

الهنا الحلو بيطمئنا بوعوده .. بيعالج جروحنا .. بيغفر خطايانا ..
واخيرا .. بيصلح ورانا