[walaa farouk]

لما تشوف بعين واحدة

تختل كل المقاييس، و الموازين تتلخبط
و تعمل الحاجة و عكسها ،
و تجري ورا فكرة واحدة لغاية ما تكتشف انك كنت ماشي
ورا نص الحقيقة بس ..

مثال : ناس تتكلم علي الرحمة علي الكل حتي الحيوان
، و نفس الناس قلبها خالي من الرحمة نحو اقرب الناس ليها
.. الصبح تشتم أهل بيتها و حبايبها و تتخانق معاهم
و تخسرهم و تطفشهم ، و بالليل تدور علي القطط توكلهم
.. و كان حقتهم يرحموا الناس قبل ما يرحموا الحيوان..

كمان تلاقي ناس تتكلم عن التدقيق في العبادة و الصلاة و الصوم
، و نفس الناس تحقد و تغتاب و تتريق و تتنمر علي الكل.
. يروحوا القداس قبل الكل ، و يلوموا اللي اتأخر،
و طول الصلاة لا بيعبدوا و لا بيصلوا
، و هاتك يا ضحك و تريقة و مظهرية و تفاخر ..

مثال كمان : واحد بيشتكي من ظلم الناس و حقدهم،
و عاوز الكل يحبه و يحترمه، و هو اصلا اللي مكره الناس فيه بلسانه الأسود و قلبه الحقود و أعماله الردية..

و كمان مثال : واحد بيشتكي من قلة الرزق
و هو ما عندوش أمانة و لا كفاءة و لا اجتهاد
، كل اللي يعمله انه يلوم حظه السيء بدل ما يتعلم الأمانة و الجد و الصدق..
و الأمثلة كتير قوي ..

افتح عينيك الاتنين علشان تشوف كويس و توزن كويس ،
ح تلاقي حاجات كتيرة اتغيرت ..