[walaa farouk]

سمعتوا قبل كدة عن عمود_العدرا.....؟؟؟؟؟

تعالوا أحكيلكم حكايته.....
طقس الكنيسة دايماً بيرسم أمنا العدرا مريم على حامل الأيقونات من جهة اليمين....
ذي ما النبؤة في المزمور قالت : جلست الملكة عن يمينك أيها الملك.....
إلا إن في الكنيسة المعلقة بمصر القديمة فيه صورة على عمود جهة الشمال
مرسوم عليها أمنا العدرا و هي واقفة.....
أيه حكاية العمود دة.....؟؟؟؟
أيام ما طلب المُعِز لدين الله الفاطمي من البابا أبرآم بن زرعة نقل جبل المقطم
كانت الكنيسة في حالة ضيق شديد جداً
لإن المُعِز قال إن الأية في الإنجيل بتقول من كان له إيمان مثل حبةالخردل
يقول لهذا الجبل إنتقل من هنا لهناك فينتقل....
وقال المعز للبابا أبرآم إن لو الجبل ماتحركش من مكانه يبقى إيمان المسيحيين باطل
و بنائاً عليه الكنيسة هاتتعب جداً من الإضطهاد اللي ممكن يقابلها.....
طلب البابا أبرآم من الشعب القبطي إنه يصلي و يصوم 3 أيام.... وفعلاً الشعب عمل كدة.....
في الوقت دة كانت الكنيسة المعلقة هي دار البطريركية....
ذي الكاتدرائية المرقسية في أمتداد شارع رمسيس وأول العباسية حالياً.....
وكان البابا بيصلي امام هيكل العدرا مريم الأوسط....
أتفاجئ البابا وهو بيصلي بتجلي وظهور أمنا العدرا أمام عمود من الجهة الشمالية
بشكل نوراني مهيب.... العدرا قالتله : يا أنبا أبرآم إطلع من باب الكنيسة هاتلاقي واحد بعين واحدة إسمه سمعان.... هاينقل معاك الجبل بسبب طهارته....
وفعلاً كلام أمنا العدرا أتحقق و نقل القديس سمعان الخراز الجبل....
وتخليداً لظهور العدرا في كنيستها بمصر القديمة رجع البابا للكنيسة المعلقة
و أمر البابا الأنبا أبرآم بن زرعة برسم صورة العدرا على نفس العمود اللي وقفت أمامه و كلمت البابا
فأول ماتروح الكنيسة المعلقة دور على العمود دة
وإفتكر قدامه إن المسيح قوي وكنيستنا القبطية الأرثوذكسية كنيسة عظيمة...