[souad jaalouk]

زوّادة اليوم: الكذب
بيخبرو عن بنت عمرها 14 سنة و خَيها زغير عمرو 3 سنين بتضلّ تخبرو اشيا مش مزبوطة و تؤلّف اشيا حتّى تضحك و تتسلّى. هيّي عندها قِجّة مليانة 250 و 500. مرّة كانت عم تعدّن و مبسوطة اجا الخَي الزغير قلها من وين بيجو هودي؟ متل عادتها قرّرت تؤلّف كذبة حتّى تضحك قالتلو هَودي كانو 250 و 500 وحدة زرعتن و صرت اسقيهن و بس كبرو قطفتن حطّيتن بالقجّة. تاني يوم اجت عم تفتح القجّة لِقْيِتها فاضية! صارت تسأل اهلها وينُن مين اخدن. جاوب الخَي الزغير: ما حدا اخدن ما تخافي انا زرعتلك ياهن كلّن حتّى يصير عندك كتير! عصّبت البنت و سألتو وين زرعن. قلها وين ما كان بكل الجنينة! و بسبب كذبها اضطرّت تفتّش كل الجنينة زاوية زاوية حتّى تلاقي المصاري و ما لقيتن كلّن! الزوّادة اليوم بتقلنا انّو و لا مرّة الكذب خدم صاحبو! الله معكن