[walaa farouk]

الجمعه اللي فاتت كنت قاعد في المذبح
ومشغل اللاب توب بحضر شوية داتا هعرضها في اجتماع
كان هايتعمل في الكنيسة بعد ساعتين
والكنيسة كانت فاضيه
وفجأه سمعت خطوات بتقرب مني
ولقيت حد واقف عند ستارة المذبح .. بس من بره
ومن صوت بكاها اكتشفت انها سيده
بصراحه كنت مكسوف جدا من نفسي وانا سامع كل اللي بتقوله بصوت بكاها العالي في صلاتها
كنت ناوي اخرج علشان ماسمعش اكتر من اللي سمعته ..
بس قولت انا كده هكسفها اكتر لما تعرف
اني سمعت اللي قالته
بصراحه مكنتش عارف اعمل ايه ..

لقيت نفسي بحط الهاند فري في ودني
وبسمع ترانيم علشان مسمعش باقي اللي بتقوله
بس مكملتش خمس ثواني وشيلت السماعه من ودني ..
علشان كان عندي فضول كبير جدا اسمع اللي بيتقال
لإن حسيت ان اللي بيتقال ده ..
رساله جيالي انا شخصياً

كانت جايه تقوله كلام كتير .. ملخصه
" مش بلومك علي طفلي اللي راح .. ولا على جوزي اللي سابني ..
ولا على صليب المرض اللي اديتهوني واللي مش لاقياله علاج
ولا جايه الومك على اقرب الناس اللي اتخلوا عني
ولا عن اهلى اللي عايروني بإختياري وقفلوا في وشي الباب ولا عن قلة الفلوس اللي معايا ..
انا بس جايه علشان اقولك ساعدني اتحمل ..
مش طالبة منك غير اني اعرف اتحمل"

حسيت ساعتها ان ايوب مامتش ..
وان الأرض لسه مليانه قديسين