[walaa farouk]

مشهد ١
(فصل مدارس الاحد )
نربع ايدينا يا ولاد .. ونكلم بابا يسوع
بابا يسوع بيحبك كلمه بكل اللي جواك
هو يقدر يحقق لك كل حاجة
اي طلب اطلبه منه هيحققه ليك ..

(كبر الولد وكبرت جواه محبة ربنا وقرر تكون كل اهتماماته ربنا )

مشهد ٢
(الالتحاق بالجامعة)
وجودك في اعداد خدام مكسب كبير لينا
وكونك انك في سن الجامعة بتكرسه لربنا ولخدمته
ده شئ عظيم .. وربنا مستحيل يسيبك طالما انت مديه كل حياتك واهتماماتك .. اوعي تقلق علي مستقبلك
مستقبلك في ايد المسيح

مشهد ٣
(صدمة ما بعد التخرج)
ايه ده مفيش شغل .. مفيش فرص .. مفيش شركة كويسة راضية تقبلني .. مفيش فلوس ولا مستقبل كويس !!
مش عارف احب و ارتبط واتجوز زي اللي اهلهم جوزوهم ..
امال فين ربنا اللي قالولي عنه انه هيحقق كل امانيك ..
فين ربنا اللي قعدت اخدم بيته من طفولتي لشبابي ..
فين مستقبلي اللي قالولي متخافش عليه ده في ايد المسيح !!!

(كان قدامه فرصة انه يهرب من واقعه ويدخل جوة كنيسة او دير ويعوض غياب الفرص في النجاح جوة اسوار الكنيسة لكنه كان صادق جدا مع نفسه وقال : )

مفيش ربنا ..
أيوة مفيش ربنا .. كل دي اوهام

لكن لاجل امانة ربنا مع شاب امين معاه من صغره .. افتقده وقاله : ايوة فعلا كل دي اوهام
بس مش وجودي .. معظم اللي اتعلمته عني
مين قال ان كل اللي هتطلبه هحققهولك .. او انا موجود علشان احقق كل امانيك .. (فين ده في اي انجيل ؟!)

مين قال : ان مستقبلك في ايد المسيح
بدون ما تتعلم من صغرك مهارات الواقع العملي وتشتغل علي نفسك !
مين قال لحد كل اهتمامه بالاتجاه الروحي بس .. انه اول ما يطلع للواقع العملي هينجح ويلاقي قصاده كل الفرص ؟!
مين قال انهم يهملوا اهمية باقي جوانب الحياة ويعلموك بس الاتجاه الروحي بصورة غير حقيقية .. ويعلموك ان هو ده النجاح !

يلا يا ابني .. انا معاك .. يلا نبدأ من جديد ..
ونصلح كل اللي اتعلمته غلط
وانا هساعدك تعرف نفسك اكتر وهستخدمك
وهتكون شخص ناجح حقيقي
وتعلم اللي يقابلك النجاح الحقيقي مش بس جوة الكنيسة لكن جوة نفسيته وجوة كليته وجوة عمله وجوة العالم .
.........