[walaa farouk]

هيفرق معاك اوي

• لو جه الوقت وعرفت ان راحتك بتبدأ من جواك مش من الظروف براك .. لما جواك ينضف من كل كراكيب وزحمة من افكار غلط وحمولة شايلها جواك .

• لو جه الوقت وعرفت ان مفيش شخص ايا كان في ايده امانك وسلامك وسعادتك .. لكن كل شخص موجود بس عشان يساندك ويساعدك في اهدافك .

• لو جه الوقت وعرفت انك مسئول عن تعافيك .. مش مسئول انك تفضل تجيب اللوم علي الظروف وعلي الاهل ولا حتي علي المعاناة .

• لو جه الوقت وعرفت ان المشكلة الحقيقية هي انك تكون مش عارف نفسك ولا عارف ايه اهدافك ولا عندك حاجات حقيقية تعيش علشانها .

• لو جه الوقت الوقت وعرفت ان البوظان والتوهان اللي جواك مفيش شخص في ايده يصلحه .. لكن الموضوع موضوعك انت .

• لو جه الوقت وعرفت انك بقيت حر وان سلامك مابقاش مرتبط بمكان ولا اشخاص ولا اشياء .. وفي كل الظروف انت متأقلم ومبسوط سواء قاعد في فندق ٥ نجوم او في اوضتك الصغيرة .

• لو جه الوقت وعرفت ان كل قراراتك المصيرية هي معركتك انت .. محدش في ايده ياخدلك قرار او يخوض معارك بتاعتك .

• لو جه الوقت وعرفت ان مفيش امتلاك بدون معركة .. لو عايز تمتلك اراضي معينة في حياتك لازم تخوض المعركة روحيا وعمليا وتشتغل علي صلاتك وعلي نفسك .

لو جه الوقت واختبرت كل الحاجات دي .. فيابختك
انت قادر تعيش بأكثر حرية واكثر ارتياحية وقادر تتحرك خطوات افضل للامام