[souad jaalouk]

زوّادة اليوم: بزمن العيد ركزوا على معناه الحقيقي

بيخبرو عن تياب بخزانة زلمي عم يتخانقو مع بعضن.
بنطلون عم يقول: ليك كيف راح لونكن عالغسيل انتو اكيد سعركن رخيص و من شي محل زغير ما حدا سامع فيه.
ردّت عليه قميص قالتلو: انت شايف حالك علينا انّك ماركة عالميّة اكيد اشتروك بإيام التنزيلات.
بتقول تنّورة: انا كنت مبسوطة بالمحل شو جابني قعدني بيناتكن.
بيطلع صوت واطي مستحي لشال صوف قديم و بيقول: انتو عم تتخانقو مين اهم و مين اغلى و مين احلى و ناسيين انّو اللي كان يلبسنا توفّى! هوّي راح و نحنا بقينا هون!
ما تشوف حالك بتيابك ال signés و لا بغراضك الغاليين قدّام ناس مش قادرين يأَمنو ابسط حاجيّاتن! بالآخر انت و هالناس رايحين نفس المحل و غراضك و غراضن باقيين هون...بزمن العيد ركزوا عا معناه الحقيقي و الله معكن