[walaa farouk]

ممكن تكون شايف شخص بيتكلم معاك وجها لوجه
، او بيتكلم معاك في رسالة (لكن في الحقيقة هو منحني قدامك)

فمثلا :
• اللي بيعتذر لك هو في الاصل بينحني ويوطي وينزل علي الارض قصادك .
• اللي بيطلب السماح والغفران هو في الاصل وشه وجسده في الارض .
• اللي بيعريلك نفسه هو جابلك نفسه علي اقل حتة قدامك انت واقف عليها .
• اللي بيبكي ويعلن ضعفه هو منحني في نفسه جدا ويعتبر واقع قدامك .
• اللي بيعاتبك بحب هو اكبر حد اتنازل عن اعلي قمم كبريائه ونزل ووطي قدامك .

•• كل دول بيكونوا في قمة ضعفهم وانكسارهم وسقوطهم ..
فأول واهم حاجة تعملها معاهم انك تمد ايدك وتقومهم من الارض وبعد كدة اي رد فعل تاني .

قومهم من انكسارهم وقولهم انت مكانك فوق مهما عملت ..
قومهم من اعتذارهم وقوله يعز عليا جدا اتضاعك واعتذارك ..
قومهم من عتابهم وقولهم مقدر اتضاعك جدا انك تتنازل عن كبريائك وتيجي تواجهني .
. ارفع اخوك الانسان فيرفعك الله بايديه لما انت تتكسر وتوطي قدامه .

طوباك لو أقمت ضعيف من ضعفه ، والويل لك لو استغليت ضعفه هذا واستقويت عليه .

اما قساة القلب اللي بيسيبوك مرمي علي الارض قصادهم
ومبيهونش يقوموك .. او يسيبوك كدة ويمشوا .. او يقولولك كلمة ورد غطاها

فتأكد ان ربنا هيعمل معاهم كدة .. وقت ما ينحنوا قدامه وينكسروا مش هيمد ايده ليهم
.. لانه كما تدين تدان وكما تغفر يغفر لك وكما تعامل اخوك يعاملك الله .
ولو انت الشخص اللي نزلت كتير كدة .. فتشجع الله في كلا الحالات هيعطيك نعمة .
«يُقَاوِمُ اللهُ الْمُسْتَكْبِرِينَ، وَأَمَّا الْمُتَوَاضِعُونَ فَيُعْطِيهِمْ نِعْمَةً»." (يعقوب 4: 6)