[walaa farouk]

قول حاجة تانية ، إنما صاحبي دي كلمة كبيرة قوي لا انت قدها و لا هي مقاسك..

صاحبي يعني تحس بي من قبل ما اتكلم ، و تقدر مشاعري لما احكيهالك..

صاحبي مش معناها "واحشني" و لا "نفسي اشوفك" ،
و لا "تعالي نخرج " .. معناها كبير قوي انت لا تفهمه و لا انت قده ..

بعد ما عرفتك كتير و استنيتك كتير و شرحتلك اكتر ، و قدمتلك اكتر و اكتر ،
و اديتك كل مشاعري ووقتي ، ووصلت معاك لدرجة اني اتنازلت عن عزة نفسي
و جيت عليها و طلعت نفسي غلطان و راضيتك علشان اكسبك،
و انت الغلطان باعترافك انت نفسك ..

لقيتك مش معايا ، انت مع نفسك و مع دنيتك و أحلامك
و انا مجرد موجود علشان احقق لك راحتك و مصلحتك.
. و اول ما موضوع يخصني نتكلم فيه ، تغلوش و تهرب و تحور و تتجاهل..
عمرى ما حسيتك قلبك علي و لا مشغول بي ، اجي بس علي بالك لما تبقي عاوز مني طلباتك و بس ..

انت عايش بس تحقق دنيتك ، و ده حقك .. انما تقول صاحبي ده مش من حقك ..

احبك طبعا ، إنما اديك سري و أاتمنك علي مشاعري
و اطمن لعشرتك مش ح اسمح لك و لا ح اسمح لنفسي ..
باطمنك أن حبي ليك اكيد ، لأنك ضحية نفسك ، لأن ربنا بيحبك
، و لاني لا اتعودت و لا باقدر ما احبش حد ..

انما مش ح اعشم نفسي معاك اكتر من كده ،
ح اطلعك من حساباتي و من ثقتي و من امنياتي و اماني ..
ح ابعد علشان ما اتجرحش اكتر ..

و علي فكرة مش ح اقولك علشان لا اتعبك و لا احرج نفسي معاك
، ح تلاقيني باعمل كده لوحدي ، غصب عني ..

و لو في يوم راجعت حساباتك ( و ده احتمال باحاول أصدق بالعافية انه ممكن يحصل)
، ح تيجي تلاقي عشرتي جاهزة و ثقتي مردودة لك ..

اصل العشرة ما تهونش علي ..

انما انت مش صاحبي من النهاردة.. انت انسان دخل تاريخي زي اي انسان ،
و ح احطك علي هامش صفحاته ، بند الصلوات و الذكريات ..

و ح اسيبك تختار اسم تاني غير صاحبي ، يا "صاحبي" .