[walaa farouk]

بمناسبة بدء الصوم
كان فيه شخص قرر يصوم الصيام من اوله علشان ربنا يقف معاه في امتحاناته ،
الغريب انه بعد ماصام الصيام كله ودخل امتحن .. " سقط "
اللي ضايقه وعصبه ان صاحبه اللي مصامش نجح وبتقدير
ساعتها قرر يقاطع الكنيسة والصيام ودخل في خصومه مع الله
اب اعترافه حاول يفتقده اكتر من مرة ، وفي الأخر حكاله اللي حصل
فإبتسم وقاله .. يا حبيبي " ربنا مابيتضحكش عليه "
مش هايكافئ واحد مجتهد مع واحد فاشل علشان خاطر صام

القصة دي تحديدا بتفكرني بناس كتير اوي في حياتنا
بيصوموا بالشكل فقط ..
يعني لو فات اسبوع ولقوني بشرب كوبايه لبن يقعدوا يقلولي
ايه ده !! مش عيب عليك واحد في سنك ولسه فاطر
يجوز فاطر بس بعرف ربنا اكتر منك
يجوز فاطر بس قلبي انقى منك
يجوز فاطر بس مش بتكلم علي غيري زيك
يجوز فاطر بس مش شايل كره للي حواليا مثلك
يجوز فاطر لأسباب شخصية لا يعلم بها سوى الله .. وانت ملكش اي حق تتدخل فيها
كونك تحاسبني انا صايم ولا فاطر انت كده حطيت نفسك مكان الله في الحساب والعقاب ..
ومفرقتش عن غيرك من اللي بيتدخل في امور ماتخصش الا الله وحده
عايز تصوم صوم لنفسك وملكش دعوة بغيرك صايم ولا فاطر
ولازم تتأكد ان الأهم من صوم المعده هو صوم القلب والفكر

الموضوع ده تعمدت انزله دلوقتي علشان كمية الناس اللي هاتحشر مناخيرها
في حياتك علي مدار ايام الصيام
فيه ناس لمجرد انها هاتحسدك علي اللقمة اللي ريقهم هايجري عليها ..
هايحولوا يكرهوك فيها ويكرهوك في نفسك علشان يبقى زيك زيهم
وتاكل زيهم لانك مش احسن منهم

الشئ اللي يغيظ ان ممكن يكون شخص فاطر ويتعمد ياكل اكل صيامي
في وجود ناس صايمه علشان مكسوف يبان فاطر قدامهم
يعني حضرتك مكسوف من منهم ومش مكسوف من ربك !!
يقولك ماهو ربنا بيرحم بس الناس مابترحمش

- خلاصة الكلام مش بقول ماتصوموش ..
انا بقول ماتحشروش مناخيركم مع اللي مش بيصوم الصيامات من اولها
سواء ظروف صحية او عدم مقدرة منه او اي سببب تاني حتى
لو مش منطقي بس هو حر ربنا يحاسبه مش انت ..
ماتضيعش شئ جميل بتعمله من قلبك بإدانتك للشخص اللي مش بيعمله زيك

ارجوك ركز في خلاص نفسك .. وتأكد انك لو صايم عن الاكل بس
، لكن لسانك مش صايم عن الإدانه .. فإنت كده بتضحك علي نفسك .. لإن " ربنا مابيتضحكش عليه "

وكل سنة وانتم طيبين