[walaa farouk]

مش الحرامي بس اللي سرق فلوسك ،
لأنه لو تاب و ضميره صحي، ح يرجعها لك ..

لكن فيه حرامية بيسرقوا حاجات عمرها ما بترجع ..

الحرامي اللي سرق حقك و مكانتك، و اخد مكانك في الشغل أو الترقية ،
لانه ظالم من ناحية و من ناحية بسبب الناس اللي وافقت علي ظلمه و ما دافعتش عنك ..

الحرامي اللي سرق سمعتك و تاريخك ،
يا اما يشوهك و يفتري عليك و يغتاب سيرتك، يا اما ينسب لنفسه حاجات بتاعتك
و ادعي لنفسه احقيتها و ملكيتها..

الحرامي برضه اللي سرق سلامك و فرحك ، اللي طول ما هو موجود بينكد عليك
و يهاجمك و يعارضك في الفاضى و المليان ..
اللي ما يهونش عليه يرطب خاطرك و يريح قلبك..
اللي يشوفك زعلان و ما يصعبش عليه زعلك ،
و يبخل عليك بكلمتين حب علي رقة علي تشجيع..

الحرامي اللي بيسرق مجد الله ، اللي لما الناس تمدحه، ما ينسبش الفضل لربنا
، و يصدق نفسه و يتعالي علي الناس ..
اللي ما يستخباش من الكرامة و ما يحولهاش لربنا تبارك اسمه ، مصدر كل عز و جلال ..

الحرامي في الخدمة اللي يحب يكون شعبية و عزوة علي حساب نفسه
و ما بخليش الناس تبص لربنا .. اللي همه الاضواء و الشهرة و بيحري وراها ..
القلب اللي بيحب ربنا صحيح الشهرة هي اللي تجرى وراه ،
و فرحته بالخفاء و بنجاح الناس و الخدام هي دليل استقامة مقصده..

الحرامي اللي عرف ده كله و ما كلفش خاطره يرجع اللي سرقه ،
يرطب خاطر الزعلان و يرجع حق اللي ظلمهم ، و يشهد حسنا عن اللي قتل سمعتهم..

الحرامي من نسل الشرير "السارق و اللص" (يوحنا ١٠) ..

ربنا يفرح قلب الجميع و قلبك بامانتك و طهارة يديك..