[walaa farouk]

تعرف انك ممكن تكره واحد من غير سبب واضح ؟؟

ده بيحصل ليك لأسباب كتير ..


ممكن لأنه عمل معاك موقف واحد أثر فيك ،
حتي لو من زمان و حتي لو ما كنتش فاكره .
. كلمة جارحة ، تريقة ، تعالي، عدم احترام
(حتي لو ما كانش يقصدها ) ،
بس سابت علامة عميقة جواك ،
بالذات لو كنت حساس زيادة للي بيقوله ،
و نفسيتك ما بتحبش النوع ده من الكلام ..


ممكن كمان لو كان عمل معاك "دقة نقص" ،
يعني قصدته في خدمة و كبر دماغه ،
أو كلمته و ماردش عليك ، أو عمل موقف جارح بالذات قدام الناس
.. حتي لو كان من سنين ، بس انت ما قدرتش تنسي له قلة أصله ..

ممكن لان معاملته معاك بتفكرك بحد قديم عايش جواك :
نفس النمط في التعالي و العنف ؛
حد زمان ضايقك و لسه ما مامتش جواك
، مدرس ، قريب ، جار ، حد اذاك في حياتك.
. و لأن فيه بينهم شبه في التصرفات أو الكلام
أو حتي الشكل ما بتقدرش تفرق بينهم ،
و لقيت نفسك بتطلع كل مشاعرك السلبية ناحيته..

كمان حاجة غريبة .. اللي ما بيحبكش بتطلع منه طاقة سلبية ناحيتك، شفرة معينة مخك بيفهمها.. من عينه، كلامه ،
و تصرفاته ؛ روحه نفسها بتشع نحوك رفض
، و الغريبة أن الرفض ده بيوصلك بالكامل و بتحسه
؛ اصل النفس فيها رادار بيلقط السلبي و الإيجابي..!!

الدرس ..
اوعي تسيب مشاعر سلبية لحد جواك :
واجه نفسك و شيل منها المرار اللي ح يتعبك انت شخصيا
.. صلي له كتير ، و اطلب انك تحبه
و اعمله له مواقف حب من قلبك ..

طبعا انا عاذرك لو ما قدرتش .
. هنا لو كل الطرق ما حسنتكش،
و لقيته نفسك مكملة في عدم الراحة نحوه
، من حقك تبعد و تتحنب اذاه، بس و انت قلبك سليم و ابيض ناحيته علشان قلبك يفضل جميل و منور ..