[walaa farouk]

عنوان غريب، مش كده ؟؟

ما تستغربش لان ممكن تكون انت اول واحد بتعمل كده ..

عندك فلوس و خايف تصرفها و تستمتع بيها و تفرح الناس معاك
، و خايف بكرة ييجى و تلاقي نفسك فقران .. يعني عندك و عايش في قحط و رعب ..

طبعا الحكمة و التدبير مطلوب، و اكيد التوازن مهم ،
و قطعا ما باتكلمش علي السفه و الاسراف في الانفاق فيما لا يفيد..

انا هنا باتكلم علي واحد عنده فلوس و عايش مرعوب يصرفها و عمال يحوشها و يعد فيها
، و مقترها علي نفسه و علي بيته و عياله و حبايبه ..
و بعدين الزمن يجرى و يكتشف أنه خزنها لغاية ما قيمتها قلت ،
و العمر جري منه و ما لحقش يفرح باللي عنده لا هو و لا بيته..

واحد يقول لي و الموضوع ده ما يزعلش ربنا ؟؟
طيب اسمع كده "...الله الحي الذي يمنحنا كل شيء بغنى للتمتع" (تيموثاوس الاولي ٦)

يعني ربنا بيديك علشان تفرح و تنبسط بعطاياه مش تعيش في ضنك و رعب

من انك تتمتع بخير ربنا اللي اداه ليك ..

الخير انك تفرح و تفرح معاك اسرتك ، و كمان بجزء من اللي عندك تفرح المحتاج و تسعده معاك ..

لكن تعيش مخزن اللي عندك ، و تقول بكره احتاجها ، و يجي بكره و تقول بعده احتاجها
، يبقي بتشيلها لغيرك .. كمان انت بتكسف ايد ربنا اللي بيديك علشان تنبسط..

فيه ناس كتير قوي فقيرة و معاها قرشين قليلين مستمتعين بيهم

لكن مبسوطة اكتر من أغنيا كتير معاهم فلوس و مرعوبين يصرفوها ..

و الغريب ان الي معاه فلوس ده و مرعوب يصرفها ،

مرات بيجيله وقت و يبعترها في كلام فارغ !! غالبا من كتر خوفه ،

بيختل في حكمه ، و بييجي في الهايفة و يتصدر : يصرف في الفارغ و يبعترها في التوافه !!

اوعي تكون فلوسك مع ايقاف التنفيذ ..