[walaa farouk]

الانكسار يبدأ من الخوف ..

تخاف من الناس ، تعيش ذليل و منبطح و مدحور ؛
راسك تنكسر و نفسك تنحني، و تخسر حريتك
و كرامتك و عزة نفسك ..

ما حدش يكسر عينك ..
لو عملت غلط من الشجاعة انك تعتذر
و تصلح اللي انت عملته علشان ما حدش يمسك لك ذلة.
. غير كده ارفع راسك و اتقوي بالحق ، كلامك واضح ، مفيهوش لف ودوران، و صوتك حازم لأنك مسنود علي الصح ..

اللي معاه الحق ما يخافش من حد مهما كان
، بالعكس اللي مخوفك هو اللي في قرارة نفسه مهزوم و مرتعش..

موسي انتهر فرعون ، ايليا انتهر اخاب الملك
و قاله "انت مكدر اسرائيل انت و أهل بيتك"
،دانيال و التلات فتية واجهوا الملك و اعلنوا ايمانهم (زي كل الشهداء "دميانة العفيفة" و "مارجرجس البطل" )
، المعمدان وقف ضد هيرودس و قال له "لا يحل لك"
، السيد المسيح قال لبيلاطس "لم يكن لك علي سلطان
لو لم تكن قد أعطيت من فوق" ..

يبقي انت تخاف من انسان زيك؟؟ و من ايه ؟؟
من كلمتين أو تهويشة أو صوت عالي أو تهديد فارغ ؟؟

ما حدش يملك رزقك و لا حياتك و لا نجاحك و لا شغلك
و لا مالك الا الله الواهب كل شيء لمن يشاء وقتما يشاء..

اوعي تعيش خايف اي مخلوق ؛ الخوف ح يزيد جواك لغاية ما يشلك و توصل انك تخاف حتي من خيالك ..
من كتر خوفك لا ح تواجه و لا ح تقرر و لا ح تفكر ، و ح تعيش زي السلحفاة ايديك و رجليك جوه غطا من حديد ، يسجنك جوه نفسك..

واجه ، بكل قوة و عزة نفس و كرامة
، و في نفس الوقت بكل أخلاق الملوك و عفة لسانهم..

تاني ، انت من نسل الأسود و الأسود لا تخاف..