[walaa farouk]

بيقولوا علينا "دقة قديمة" ، و لو ..
قديمة قديمة ، بس دقة "الزمن الجميل" ..

في زماننا الجميل ماركة ملابسك عمرها ما بتحدد قيمتك
، و المال عمره ما بيدي صاحبه سعر انما أخلاقه و مبادئه ..

في الزمن الجميل الصدق هو الأصل، و الامانة بالكلمة مش بالاوراق و لا العقود ، كلامنا سيف علي رقبتنا ووعودنا
و مواعيدنا مضبوطة علي الساعة ..

في الزمن الحلو اللي اتربينا فيه ، كنا بنبوس ايد اهالينا ،
و نقول لهم "حضرتك".. كانت بصة بابا أمر واجب النفاذ
، و زعله من زعل ربنا نفسه (تبارك اسمه) ..
و كنا بنقول "شكرا" ، "لو سمحت" ، "عن اذنك" ، "حاضر" ..

في دقتنا القديمة عمرنا ما سألنا واحد عن دينه ،
كانت بيوتنا مفتوحة علي بعض ،
و كانت الحاجة وصال بتبعت لأمي طبق العاشورة،
و امي تبعت لها نفس الطبق فيه البسبوسة الصيامي ..
كنا بنلعب مع بعض في العمارة و المدرسة و الشارع
، محمد مع مجدي مع عمر مع مايسة مع مي
، ناكل سوا و نحكي لبعض كل الحكاوي اكتر من الأخوات
؛ في الدقة القديمة لما ارجع من المدرسة
و ما الاقيش حد في البيت، ماما زينب تستناني و تغديني
و تطمني أن بابا و ماما خرجوا لظرف مستعجل
و راجعين بعد شوية و تخليني اقعد العب عندها لغاية ما يجوا..

في الدقة القديمة سيدنا أو ابونا كلمته علي رقبة الكل ،
و امين الخدمة طاعته واجبة ،
و ما نقولش عليهم اي كلمة بطالة "عيب قوي" .
. القداس كله هدوء و احترام ، و لما طفل يبكي
، ماما من نفسها تخرج بيه لغاية ما يهدأ لوحده..

في زماننا الحلو الشارع كان محترم ، كا حدش يرمي ورقة ..
ما حدش يقدر يضايق ست ماشية لا بكلمة
و لا بنظرة لانها في مقام أخته أو امه ..
مفيش مكريفونات و لا كلاكسات مزعجة .
. الخناقة تخلص اول ما واحد يخش و يقول "استهدوا بالله يا جدعان" ؛ الفقير كان فقير بجد مش مدعي فقر ، و الإحسان له واجب جميل ..

في زماننا الجميل العيلة متجمعة في الخير،
الخلافات تتحل لان اللي ما لوش كبير يشتري كبير بيتسمع كلامه
و يراجع نفسه ، و ما يتنيش على كلمته ..
ما كانش فيه موبايل يعطلنا عن ربنا و لا نفسنا و لا حبايبنا ، و كان التليفون ابو سلك احلي ١٠٠ مرة ..

في زماننا الصداقة اصيلة، مفيش حد يخدع حد أو يتكلم علي حد
، كله بيلتمس العذر للكل ، الجدعنة اصيلة ، و الأصحاب اكتر من الأخوات..

دقتنا القديمة حلوة قوي ..
و زماننا الجميل ممكن يرجع بالناس الحلوة اللي ماليين الدنيا زييكم ، بس لو كل واحد ابتدا بنفسه ..