[walaa farouk]

"تقول له ثور، يقول احلبوه" ،
مثل عبقري يشبه مثل "خالف تعرف" ..
ده النفس المعكوسة ، reversal psychology ..

اي حاجة تقولها لازم يقول عكسها
لمجرد ان يبقي له رأي مخالف..
طبعا ده مش معناه أنك توافق الناس علي طول
، و تبقي منبطح !!
لكن الشخص ده بيتصرف كده لا شعوريا
علشان عاوز يثبت وجوده ،
و مش عاوز حد "يطحنه أو يسفلته " من وجهة نظره طبعا..

يبان قوي انه معارض علي طول الخط ،
و ما عندوش منطق في المناقشة
.. و اي رأي لازم يتدخل و يعدل و يجود و يعارض..
و لأنه ضعيف الحجة بيتعصب،
و يقعد يجادل و يقاطع و يعلي صوته
لغاية ما يوصل اللي قدامه للغضب أو انهاء المناقشة ..

و مرات يقول الحاجة و عكسها من كتر ما هو "معكوس النفس"
، و منطقه مبتور و حججه عرجاء..

و بعد كده لما يهدأ و يكتشف غلطه (ده لو اكتشف أصلا )
، يضطر يرجع في كلامه و يصحح موقفه
بس بعد فوات الأوان، و بعد ما الزعل بينه
و بين الناس ما يكون وصل لقمته..

معكوس النفس طيب القلب لكن حاسس بقلته و ضعفه.
. محتاج يعرف أن الحجة الحلوة بتكسب الناس ،
و أن كتر المعارضة بتخسره نفسه قبل ما بتخسره الناس ..

معكوس النفس غالبا اتعرض لقهر من طفولته
و اتحرم من أنه يقول رأيه أو يحقق نفسه المستقلة ..

عاوز اللي يستوعبه و يشرح له بالراحة ؛
و لازم يراجع نفسه قبل ما علاقاته بالناس تتقطع
، و بدل ما يعالج نفسه يرمي اللوم علي الناس الصح
اللي دايما شايفهم غلط ..

معكوس النفس علي قد طيبته حزين و مسجون جوه عقله الضيق ..

مع كوكتيل حب و صلاة و صبر و طولة بال من اللي حواليه
، بيخرج بالراحة من سجنه الحرية و النضوج..