ابوه وصاه يكون راجل
يروح للحق ميخافشي
وامه قالتله لو هتموت عشان مبدأ
متبخلشي ..
ومات محمود!
مات اللي دافع عن صبية بيُنتهك عرضها
علي يد مجرم بس له واسطة
علي يد ناس بتفادي روح بفلوس
مليون جنية واسكتوا
راجح هيخرج مهما هتثوروا
الأم قالت ودم ابني يروح؟
كل الشوارع نايمة يومها والدموع علي خدها
امه بتنزف دمع من قلبها
محمود بيجري من حلاوة الروح
وابن الوسايط حالف يموت فيه
الشعب رافض كل شئ إلا القصاص
ونشوي أم الكلب بتهديه
وتقوله اطمن
يومين هينسوا وتطلع لي
مفيش ف البلد دي حقوق
مادام واسطتنا ساندانا
يرد الشعب بقوة المظلوم
والله ما هننسي
حق الولد هيعود
راجح هيُعدم مهما هتقولوا
زاد السكوت فينا
وطفح الكيل
وشمس الحق راح تطلع في عز الليل
حق اللي مات بالغدر راح يرجع
والظلم مهما يسود
حق الولد هيعود