[walaa farouk]

صديق مع ايقاف التنفيذ

١-يغيب يغيب، و لما يفتكر يتكلم يبقي مناسبة أو طلب مفاجيء..

٢-مش قادر يخبي مصلحته منك ..
يتكلم يسلم و يعلي الاشواق : واحشني و عاجني
و انت مهجتي و انت حتة من قلبي ..
و بعدين طلب او طلبات، و لو ما قدرتش عليها
و اعتذرت أو كانت مش مناسبة، ياخد الباب وراه
و يتدور و يختفي بكل غضب !!

٣-روحه "كلها مرار" ، ضحكته "ساقعة قوي"
، ابتسامته "قتمة جدا" ، عاوز يخلص الكلام و يجري منك
، و الحديث بينكم بيتقطع لوحده..

٤-مع عندوش لهفة عليك، لا في مشيته و لا في طلته
و لا في تحيته و لا في كلمته..
و الغريبة كل ده بيتحس من غير ما يقصد ..

٥-وقت الشدة لازم يختفي ،
و لأنه ذكي يقدم لك اعتذارات جاهزة بس مفقوسة :
كنت مسافر ، عيان ، عمي بعافية ، بنت خالتي متضايقة !!

٦-عمره ما يفرح لفرحتك ،
و لو جت سيرة عن نجاحك يغلوش علي الكلام
و يغير الحديث يا عن نفسه يا عن غيرك يا عن اي موضوع ..

٧-ينفسن عليك ، و يجرحك غالبا بشكل غير مباشر علشان ما يبانش ،
و في ضهرك يلقح عليك بالكلام
و يبعت للناس رسايل وحشة عنك :
مغرور ، اناني، بتحب نفسك ، بتمثل التقوي ..
و لو ما "لقاش في الورد عيب يبقي احمر الخدين " ،
و اهو يلطش فيك و السلام !!

٨-يعايرك بالماضي : ضعفات ، خلافات ..
و عمره ما ينسي لك عيب .. مرات كمان يجود اكتر فيتبلي عليك
و تبقي طول الوقت تدافع عن نفسك قدامه
في حاجات انت اصلا ما عملتهاش..

٩-عنده ظاهرة "النفسية المعكوسة" reverse psychology ،
يمدحك بمبالغة شديدة، و هو يقصد العكس تمام .
. و بالمناسبة بيبقي "مفقوس" قوي ..

١٠-يورطك و يحملك الذنب دايما،
تطلع من عنده يا مطلوب ترضيه، يا مطلوب تعتذر له ..

كل ده له اسم واحد بس : صداقة كدابة،
أو صداقة مع ايقاف التنفيذ...

و الحل ؟؟
تدور علي صداقة غيره ، حد يحبك بجد ..

و ما تعشمش فيه تاني ، تتجنبه علي قد ما تقدر،
لأن عشرته مرار و دمار و من غير ثمار ..

و تبقي تحطه في خانة الصلوات و الذكريات !!