[walaa farouk]

ها أنا أرسلكم مثل حملان .

الخروف اقل الحيوانات ذكاء و اكثرهم ضعفاً علي الاطلاق.
. فما بالك بالحمل ؟؟ (الخروف الصغير )

طيب ليه ربنا سمي ولاده "القطيع الصغير"،
يعني "حملان"

-الحمل ما يعرفش يدافع عن نفسه ابدا ..
و طول ما هو حمل لازم يلزق في الراعي يتحامي فيه ،
و عاوز حراسة مستمرة ،
و الا اصغر ذئب أن شالله رضيع يفترسه ..

سهل قوي يتوه.. الحمار و الثور
عمرهم ما يتوهوا يعرف صاحبه..
، لكن "كلنا كغنم ضللنا"
علشان كده عاوز راعي علي طول
لأنه لو تاه ما يعرفش يرجع بيته ،
و ممكن يمشي ابعد لغاية ما يتوه اكتر و يقع من علي اقرب جبل ..

الحمل ما يعرفش يدور علي الاكل ،
و ممكن يرعى في نفس المنطقة لغاية ما العشب يخلص
، و ممكن كمان ياكل اي حاجة قدامه ممكن تؤذيه .
. لازم الراعي ياخده بنفسه "المراعي الخضر "
و الا يموت من الجوع !!

الخروف الصغير اول ما يشوف المية يجري يشرب
، فصوفه يتملي بالماء، فيتقل وزنه و يغرق .
. برضه لازم الراعي يقوده للمياه الهادية
اللي من غير تيارات علشان ما يتزخلقش ،
و دي اللي سماها الكتاب "مياه الراحة"..

كلنا "حملان الله" ..
عندنا عجز ما بعده عجز، و ضعف ما بعده ضعف ..

الحملان عاوزة راعي ، يوكل و يشرب و يحمي و يرشد و يدافع
، و يحمينا من "قلة حيلتنا" و "حيرة فكرنا" ؛
راعي جميل مسؤل عنه و يسدد كل احتياجاته ..
راعي عارف كل واحد باسمه
بشخصيته، بتفاصيله الصغيرة
؛ راعي مسؤول عن حمايتنا وتوجيهنا وتسديد احتياجاتنا.

اوعي تعمل نفسك ناصح و تبعد عن راعيك
، طلعنا نزلنا انت و انا شوية حملان
، من غير الراعي ح يعوزنا كل شيء ،
و تحت ضله لن يعوزنا شيء ..