[walaa farouk]

الحمل المرفوض bummer lamb قصة مشهورة يعرفها رعاة الغنم ،
عن حمل مرفوض أو منبوذ أو بحسب الترجمة الحرفية "الحمل المشكلة" ..

و هو الحمل اللي امه بتموت وقت ولادته ، فما يلاقيش حد يهتم به ..

أحيانا تانية امه بتعيش، بس لأنه الابن التالت (و ده نادر في ولادة الحملان ) ،
تختار أقوي اتنين و تهمل التالت و احيانا تمنعه من الاقتراب منها و من الرضاعة..

احيانا تالتة تعاني الام من التهاب الثدي بعد الولادة، فبرضه ترفضه و ترفسه..

الحمل ده بيبقي محروم من الرعاية الجسدية و من الرضاعة
، مكسور النفس و تجيله حالة اسمها "دلدلة الراس " .. و بعدين ينزوي و يعتذل القطيع..

و الأكثر غرابة أن الأم لما بتلاقيه مكسور كده رفضها له يزيد لانها بالغريزة تفتكره مريض فتهمله إلي الموت..

و فيه بعض الرعاة اللي مش فاهمين حالته يعملوا زي الام و يسيبوه،
لأنهم مش عاوزين حمل معيوب، و عبء عليهم و علي القطيع كله..

فيه بقي "راعي صالح" ، يلاحظ "الحمل المرذول" ، فياخده بيته الخاص
، و يلفه في رداء دافي لان حرارته بتنخفض من قلة الرضاعة،
و يقربه من صدره علشان يسمع دقات قلبه زي ما كان مفروض يسمع دقات قلب امه فيطمن..
و بعدين يديله الرضاعة الصناعية كل ساعتين زي الرضاعة الطبيعية ..

و لما يتقوي بعد كام شهر يرجعه القطيع مرفوع الراس، سليم النفس و الجسد ..

الجميل أن كل مرة الراعي بينادي علي قطيعه
، "الحمل اللي كان مرذول" هو اول واحد بيجري عليه
، حتي بعد ما يكبر، اصله عاش جوه حضنه فترة وجعه ..

تتصور أن دي نفس الآية اللي اتقالت عن السيد المسيح فترة تجسده؟
مرفوضا من الناس، ولكن مختار من الله" (١ بطرس ٢) ..

و لأنه اترفض من خاصته و خاصته لم تقبله(يوحنا ١) ،
هو اكتر واحد حاسس بيك و بكل المرفوضين !!

لكل حمل مرفوض من الناس ، انت "مختار " من الله ..