[walaa farouk]

عارف يعني ايه واحد يتبلي عليك ؟؟

يعني يتهمك ببلوة حصلت و انت ما عملتهاش..
يعني يدعي عليك بالخراب و انت بريء ،
يعني يصمم علي انك السبب و انت ما جيتش جنبه
، يعني يقل الناس عنك الشر و الردي و انت مظلوم،
يعني يخللي الناس تصدق انك شرير و انت ما لكش دعوة بأي حاجة ..

ده قتل بدم بارد، و دبح بسكينة تلمة، ده سحل للكرامة، و سلخ للنفس، و طعن في الشرف ..

و فيه ناس فعلا كده : ترقص علي دماء المظلومين ..
و العجيب انهم مصدقين نفسهم ، و مكملين في شرهم و غيهم..

ده معني "تذلل" اللي اتقالت علي السيد المسيح .. "ظلم أما هو فتذلل" (اشعياء ٥٣ ) ..

ياه علي الذل اللي كسر قلبه و هو واقف أمام الناس اللي افتروا عليه
و بصقوا عليه و اتهموه في شرفه و عزة نفسه و كرامته و رسالته
قدام اعز الناس ليه "امه العذراء و تلاميذه الأطهار " ،
و قالوا عليه مجدف و مضل و مجرم و مختل العقل ، و طلبوا صلبه ..


عدت الايام ، و اللي شتموه و اتبلوا عليه سجدوا عند رجليه ..

كل ده كان وراه "رئيس الشر" اللي لسه بيعمل كده فيك علشان يكرهك في نفسك
و يرميك في بير اليأس المضلم و يسلبك سعادتك و يسيبك تموت نفسيا بقهرتك..

عارفين ؟؟
احنا كخدام للملك بيتعمل فينا كده و اكتر .. بنتشتم و نتهان و يفتري علينا (١ كورنثس ٤) !!
كل يوم اللي بنخدمهم بيدبحونا و ينهشوا لحمنا و يشهروا بينا و ياكلوا و يشربوا علي سيرتنا
، و احنا بنخدم تراب رجليهم ..

اوعي تتهز يا بطل ..

انت صح، و المفتري عليك ح ينبح شوية و ح يتخرس..
شوية ظلم ح يجوا عليك زي ما يوسف اتهموه في سمعته و رموه في السجن ،
و بعدين كله اتنسي و ربنا اظهر للنور حقه و اللي شتموه بعد شوية سجدوا له ..

الاسود ما تخافش من الكلاب، و انت ابن ملك الملوك ، من سبط الأسود ..