[souad jaalouk]

زوّادة اليوم: بلد القديسين

مرّة شب تعبان من حياتو و متشائم و ما بقا عندو امل بشي عم يشكي همّو لرفيقو قلّو: بتعرف انّو بالليل بتصير كل المناطق متل بعضها...
قلّو رفيقو: مش مزبوط! انت عم تشوفن متل بعضن لأنّك مش شايف فيهن الّا السواد و العتمة اللي بتجمعن! كل منطقة ريحتها شي، كل منطقة بتشوف بسماها النجوم و القمر من زاوية غير عن التانية، و لا وحدة طقسها متل التانية، و لا وحدة سكّانها متل بعضن... الإنسان بس يركّز عالإشيا البشعة ما بيشوف غيرها بقا! للأسف هيدا واقع وطننا اليوم... اذا بدنا نعدّ ما منلاقي الّا سلبيات، لا بيئة لا اقتصاد لا مواطن حاصل عا حقوقو، الناس مهدّدة بلقمة عيشها، ولاد بلا تعليم، مرضى مش قادرين يتعالجو، شباب بلا شغل... بس بكل هالعتمة دايما خلّو مطرح لو لنور شمعة زغيرة، ما تفقدو ايمانكن بالرب اللي هوّي قادر عا كل شي و اكيد ما رح يترك وطن القدّيسين بدون ما يخلصو...صلّو و ما تملّو...الله معكن