[walaa farouk]

عاوز تتعرف على ربنا بشكل شخصي وتفهمه؟
سيبك م اللي بيتكلموا عنه وبلسانه .. اللي رابطين البركة بالسمع والطاعة ..
اللي عاوزين يفضلوا دايماً حاجز بينك وبينه .. ويقيدوك بطقوس وعادات ميتة ..
وروح دور عليه ف كتب العلم والأدب والتاريخ .. ف الفن والموسيقى ..
ف ناشيونال چيوجرافك وديسكڤري ساينس ..
ف كل مجال يشغل عقلك وينميه ويخلق جواك أسئلة وصراعات ..
لأن الاسئلة بتنور وتحرر .. والاجابات بتطفي وتقيد ..
وربك نور وحرية ..

عاوز تخدم ربنا بجد وتصير فلاح مثمر ف كرمه؟
سيبك من خدمة المباني والاداريات ..
سيبك من خدمة الناس اللي لابسين اللي ع الحبل وجايين يتمنظروا
ويتصنعوا التقوى والقداسة المزيفة يوم ف الاسبوع ..
وروح انزل الشوارع .. دور ع المشرد والمدمن .. ع الزانية والمكتئبة .. ع الحرامي والفاسد ..
وهناك اقعد تحت رجليهم .. ابكي معاهم وعليهم .. احضنهم وبوس على راسهم ..
واتألم واتوجع لحالهم ..
لأن الوجع والألم بيكبر وبيشبع .. والرحرحة والخدمة الشكلية بتقسي القلب وف الاخر بتموت ..
وربك شركته الألم والشوك والموت كل يوم ..

عاوز علاقات تشبعك وتسندك وتكبرك؟
سيبك م الشلة واللمة خروجات بعد الاجتماع ..
سيبك م علاقات المصلحة والمنظرة والاشكال اللي من برة بتلمع ..
وروح دور ع الامناء واللي بيعافروا علشان يكبروا ..
دور ع اللي علاقتك معاهم هايكون فيها محبة بدون اغراض .. وحدود واضحة وصريحة ..
دور ع اللي هايختلفوا مع رأيك وهايفضلوا يحترموك .. اللي هايقبلوا غلطك
ويسامحوك بدون ما يرجعوا يعايروك ..
اللي هايفضلوا قريبين منك مهما بعدت المسافات ومهما اتغيرت الظروف ..
لأن العلاقات الحقيقية حياة جوة الحياة .. والعلاقات المزيفة وحدة ومرار وجحيم يومي ع الأرض ..
وربك بيدور على جسد حي يصير هو راسه ..

#افرد_جناحاتك_وألمس_السما