[walaa farouk]

أوقات كدا بتمر على الواحد مواقف بيبقى فيها بيسمع ناس
وعن معاملات الله ليهم وتسأولاتهم ليه - ليه بيسمح لهم بالفقد أو الوجع أو الجرح أو أو أو
ومش بيبقوا واخدين بالهم من هدف السماح دا أو فاهمين الدرس
أو المغزي من كدا ساعات بحط نفسي مكانهم أوقات بيبقى ليا أسئلتهم
ويمكن اكتر كمان وأوقات تانيه بقول جوايا فيما معناه التسليم للأمر
واني متأكده وواثقه أن كل حاجه هتعدي وأنه موجود يمكن نايم جوه السفينه
ومحتاج اني اصحيه ينتهر كل الصخب اللي انا فيه.
بس فكره إلقاء اللوم عليه دي هي اللي بقف قدامها كتير عاجزه خصوصاً انها بتتقابل منه بالصمت
بس فكره التسليم اللي بشوفها في ناس كتير بتعجزني عن فهم ايمانهم اكتر -
في فرق كبير بين استسلام وتسليم.
حقيقي الناس اللي بتسلم لارادته دي ناس مليانه بسلامه واكيد ليهم تعويض لمساته
مقابل الثقه الكبيره اللي هما حطينها فيه.
مره حد كتب أن الله يحتاج ثقتي لا أسئلتي وفهمتها من الناس اللي بتسلم ليه الدفه والأمر.
ماتحصرش ربنا جوه اسئله لأنه أكبر من كدا بكتير لكن احصر نفسك في دايره
واقفل عليك وحاول تفهم القصد من الحاجه اللي بيحصرك فيها ماتسمحش لنفسك تتوه
لكن علم نفسك تشوف مقاصده فتش جواك اكيد في خراب محتاج تصليح.
الإيمان مش محتاج اسئله واجابات لكن محتاج ثقه وثبات 🙏