[walaa farouk]

حتي الضحكة بقت صناعي !!

من كتر الجروح من الناس ما بقناش فينا عافية نفرح..
و علشان نداري اللي فينا و ما نحملش حد همنا
، و كمان علشان ما نقلش في نظر حد و لا حتي قدام نفسنا
، اشترينا حبة ضحك صناعي و رسمناه علي وجوهنا !!

و بقت ضحكتنا "بلاستيك" ،
زي الوردة اللي ليها شكل من غير حياة
، ولا روح و لا رائحة عطرة ..
اهي مجرد ديكور يدي شكل و بس..

لكن يا ما تحت الضحك اللي فينا وجع كبير
، مدفون، خايفين نطلعه..
اصل ياما طلعناه و محدش حس بينا
، يمكن بالعكس ندمنا لما حكينا و شكينا،
ما لقيناش اللي يسمع و لا اللي يقدّر و لا اللي يحس..

و حتي اللي حس بينا يومين و ما بقاش يرد و لا يحن
، و كله بيقلب عيشه !!

يا ضحك منين اشتريك؟؟ و يا حنية منين اجيبك
و انا اجري لك جري ؟؟

و يا مين يترفق باللي بيضحكوا،
و يعرف أن اللي علي وشهم "صناعي"
، مخبي وجع سنين و سنين..

و يا مين يعرف أن صاحب الضحكة دي
يمكن يكون محتاج اللي يحس به و يسمعه
و يداويه اكتر من أصحاب الدموع ..

ده من قوته انه خبي وجعه ورا ضحكته ،
و مستني بس حد يقوله "انا جنبك و سامعك
و فاهمك و باحبك " ، دي عنده بالدنيا..

و كلمتين من دول يساووا عنده العمر بحاله!!