[walaa farouk]

محدش فينا يقدر يقول انا مش بسمع ربنا .. كلنا بنسمع .. صوت خافت جوانا .
.دايما قبل ما نسلم ارادتنا للشهوات .. بنسمع صوت بيقول : بلاش ديه خطية ..
اوقف .. لثواني بنقف .. لكن بنسمع صوت تاني بيقول :
مفيش مشكلة انت انسان ضعيف ربنا خلقنا عندنا احتياجات .
. انت محتاج ديه مش سرقة .. انت بتتعب داه حقك .. عادي كل الناس بتعمل كدا ..
انت تستحق تكون مبسوط ..
و لو في يوم قالك : روح بيع كل حاجة و فرقها علي الفقراء و تعالي اتبعني .
. حمشى و حتركه حزينة لأني غنية جدا زي الراجل الغني اللي اتكلم عنه الرب يسوع ..
كل واحد فينا غني جدا في حاجات غير التاني .. لكن الرب عارف ضربة كل واحد فينا
.. كل واحد فين غني ؟ .. بيشاور و بيقولنا .
. و احنا بنسمع كويس اوي لما بيقولنا روح بيع .. تخلي عن غناك ...
و تعالالي محتاج مخلص .. و انا حخلصك .. تعالي محتاج لمعين و انا حعينك ..
ممكن ابقي غنية في خدمتي له .. بحبها و بعملها بأمانة اكتر ما بحبه و امينة له ..
ممكن اكون غنية في كرامتي و سمعتي ..او غنية في علاقة قريبة من قلبي و عقلي .
. او غنية في محبة العالم .. و في يوم حينزل علينا بكلمات صعبة جدا
و يقولنا : روح بيع و تعالي اتبعني ..
كلمات قاسية جدا علي الأنسان اللي مازال يحيا بالذات اللي وقودها الشهوات و الأعمال
و الأنجازات و العالم ... اما نفس الكلمات ديه لو اتقالت لأنسان بيحيا بالطبيعة الجديدة
اللي وهبت له من الله .. طبيعة الله .. بيكونوا سهل تنفيذهم ..
و بكامل ارادتنا بنسلم ارادتنا للمالك علي قلوبنا ..
لسيدنا و كل حياتنا .. لكن المشكلة هنا .. اننا لو رفضنا ..
الرب مش حيمشي ورانا يقنعنا نرجع .. او يقنعنا نبيع ..
او حتي يقنعنا نتبعه .. هو قال و هو قادر برغم ضعفنا يكون هو قوتنا..
المهم نسلم له ارادتنا .. و نعوز نتبعه علي الرغم من الصعاب و الطريق الصعب .
. و ساعتها هو بيحل فينا .. و بينفذ هو اللي بيطلبه مننا ..
علشان كدا صعوبة و سهولة تنفيذ وصايا الله بيعتمد علي مين بيحيا : انا بالذات ملك .. و لا هو ملك وحده ؟