[walaa farouk]

فرق بين المحبة و العشم ..
حب الكل لكن خللي عشمك في اللي لقيته بيحس بيك و يقدرك زي ما انت ..
الخدمة تختلف عن العشرة و القرب.. تحب الكل من قلبك ،
و تتمني لهم كل خير ، لكن تختار اللي تقرب منه و تثق فيه و تأتمنه علي نفسك و علي سرك ..

الحب انواع : تحب الكل ده أمر مفروغ منه لان الكره مرض و نار بتولع في الضلوع
.. لكن نوع الحب اللي بين القريبن مختلف ، تبادل مشاعر و ود
، و ثقة متبادلة عاوزة وقت طويل و بناء هادي و حكمة في الاختيار ..

الحب مش معناه القرب من كل الناس و لا معناه صداقة كل الناس و عشرتهم .
. الحب حالة القلب ، إنما الصداقة يعني اتنين اختاروا بعض بكل وعيهم
، و الايام أكدت انهم ينفع يعيشوا مع بعض و يفهموا بعض و يقبلوا بعض زي ما هما ..

الحب ده مفيش فيه فصال، إنما الصداقة و العشم ما تنفعش غير مع ناس قليلة فعلا .
. حب الكل و نقي منهم اللي عشرته تفرحك و تزودك..

.-حب الأعداء يعني احسن ليهم و جاملهم في افراحهم و احزانهم ،
و صلي لهم ، و باركهم في قلبك و علي لسانك..
عمر ما الوصية قالت "عاشرهم " و لا "صاحبهم" ،
لأن ده لا ح ينفع من الطرفين، لاختلاف الطباع و الاخلاق ..

لا توجد استحالة المحبة، لانها حالة قلبية مشحونة بالرصيد السماوي،
إنما توجد استحالة للعشرة بين بعض الناس ،
اللي حاولنا معاهم بكل الطرق، و طلعت خساير عشرتهم تفقدنا سلامنا
و أخلاقنا و راحة بالنا .. هنا البعد الحكيم عنهم ضرورة حتمية ..

-المتزوجين ليهم كلام مختلف تمام و لكل مقام مقال ،
لأن الزواج عمل ربنا اللي وحدهم ..
و لو فيه صعوبة في العشرة لازم طرف حكيم يتدخل
و الاتنين يبذلوا اقصي جهد لشفاء الحب المجروح .
. غير كده فيه كلام تاني في مقال تاني .