[walaa farouk]

هي دي الدنيا متلخصة في كلمتين
انها بكل اللي فيها حق انتفاع ، مفيش حد يملك فيها اي حاجة ..

معاك ورق ملكية لكل حاجة عندك ، صح ؟
شقتك ، ارض ، عربيتك ، حسابك في البنك ، و غيره و غيره ..

لكن تعال نفكر : نفس الشقة اللي انت فيها من كام سنة
كانت باسم والدك، و بعد كام سنة (ربنا يطول في عمرك )
ح تبقي باسم حد من ولادك ، صح
.. يبقي انت كنت عايش فيها حق انتفاع و بس ،
لغاية ما تخلص رسالتك و بعدين تسيبها للي بعدك
زي ما سابهالك اللي قبلك ..

و الدنيا كلها بتلف كده علي الكل ..
الغريب أننا بنتخانق و نكره و يمكن نقتل بعض علي حاجات
ربنا مسلفهالنا نقضي بيها كام يوم ، و بس..

مفيش ملكية حقيقية في الدنيا ، مجرد ملكية وهمية ..

زي غرفة الفندق تبقي بتاعتك يومين الايجار ،
و بعدين ترجع لأصحابها، أو كرسي الطيارة أو القطر أو التاكسي
، يبقي بتاعك كام ساعة لغاية لما الرحلة تخلص
و يجى اللي بعدك ياخده !!

لو فهمت كده ح تعمل حاجات كتير حلوة ..

ح تنبسط باللي عندك و تعمل بيه اكتر حاجات حلوة
تفرح بيها مع كل حبايبك ..
حوش صح بحكمة طبعا لكن اوعي تقرطها علي نفسك و علي غيرك ..

كمان ح تبطل تتخانق و تضيع سلامك علي حاجات
تتحل بشوية تفاهم .. اخسر فلوس بس ما تخسرش راحة بالك
، و اوعي تضيع عمرك علي حاجات هي في الاخر مش ملكك..

تالت حاجة ح تبسط اللي حواليك
و تخليهم يفرحوا بوفرة عطاياك، و ح تفتكر ان كتير
من اللي حوشناه يا رميناه، يا نسينا انه عندنا
، يا تلف و عت و باظ من كتر الخزين..
كده ح تفرق و تكتر من خيرك علشان قلبك يعيش مرتاح ..

افتكر ان الدنيا حق انتفاع ، استفيد منه
و فيد بيه الناس علي قد ما تقدر ..