[walaa farouk]

يا ما اشترينا و يا ما رمينا..

بنشتري بعينينا، و بنشتري اللي عاجبنا مش اللي لازمنا!!
بنشتري بدل حاجة حاجات مش محتاجينها، و كتير بنشتريها و احنا عندنا منها أصلا..

بينحشر في دواليبنا هدوم يمكن لبسناها مرة ، أو ما لبسناهاش و لا مرة ..
و بعدين موضتها تقدم فنرميها، و بعدين نفس الموضة ترجع ، فنشتريها تاني ..

بنسترخص و نشتري فتطلع الحاجة بايظة ، أو نشتري أغلي ماركة
و تطلع ما تفرقش عن ابسط ماركة حاجة ، المهم نشتري و نشبع عينينا!!

بنشتري حاجات (موبايلات مثلا ) لمجرد ان موضتها قدمت شوية ،
و الفرق يمكن بس لونها أو طولها ، بس علشان يتقال أن معانا آخر صيحة،
و بعدين نرمي اللي عندنا أو تبيعه برخص التراب ..

وبعد ده كله نشتكي من الغلا ، و نشتكي أن الحاجات الأساسية مش قادرين نجيبها
بعد ما ضيعنا فلوس كتير في الكماليات و الشكليات..

و الاعجب من ده كله أننا نبعتر فلوسنا علي الفاضي،
و نعمل ناصحين علي واحد بياع غلبان و نقعد نفاصله في جنيه واحد
، أو نيجي علي فلوس ربنا و نيجي عليها ، و ما نفرحهوش بعطايانا (اللي هي أصلا من ايديه)

الحكيم اللي يعرف أن اللي ح يشتري اللي مش لازمه
، بكره ما يقدرش يشتري اللي لازمه..

و الحكيم اللي يعرف يستمتع باللي عنده و يتصرف بتوازن ،
و يحسن الصرف و التوفير ، من غير تقتير و لا تبذير