[walaa farouk]

كنا زمان نسمع الجملة الساخرة من جدودنا الطيبين
"ما عندكش نفس المقاس بس أوسع ؟! " ..

و الحقيقة ان الكلمة دي عبقرية ..
ليه؟؟
لان مفهوم أن المقاس لازم يبقي مظبوط لكن فيه شوية براح،
علشان تعرف تتحرك جوه اللبس و تمشي أو تقعد مرتاح ..
يعني المقاس يبقي قدك و كمان مريحك ..

و الحكيم هو اللي يدور علي مقاسه.. ما تشتريش أغلي لبس ،
اشتري اللي يريحك علي مقاس جسمك و مقاس ذوقك و مقاس جيبك ..

و المقاس مش بس في اللبس ، في حاجات كتير قوي ..

مثلا الكلية اللي ح تدرس فيها ، مش مهم هي ايه
، المهم علي مقاس عقلك و مقاس إمكانياتك و مقاس ميزانيتك ..

و الشغل اللي ح تعمله ، يبقي علي مقاس قدراتك ووقتك
، و راحة بالك و بال مراتك و ولادك ..

الجواز كده برضه ، ما تخترش اجمل بنت و لا تختاري اوسم راجل ؛
تختار اللي علي مقاس طبعك و مقاس عيلتك و مقاس نفسيتك و مقاس روحياتك..

انك تلاقي مقاسك ، و كمان "أوسع شوية" يعني مريحك ،
و تحسن اختياره ، دي نعمة و بركة و خبرة و حكمة ..