[walaa farouk]

بيتريقوا علينا أننا اتربينا قوي ..

اتربينا أن احنا ما نردش علي حد و لا نجرح حد ..

اتربينا ما ناخدش حقنا بدراعنا، و نسيب ربنا يدافع عنا ..
و اتربينا نحترم الكل بالذات الكبير ، و اتعلمنا أن الكبير كبير مهما غلط ..
اتربينا ما نغشش، و نبقي امناء قدام الله في كل صغيرة و كبيرة ،
نشيل اللقمة من الأرض و نحطها علي الرصيف لان دي نعمة ربنا ،
و اتعلمنا نرجع حتي القرش اللي مش بتاعنا لأصحابه ..

اتربينا ما نرميش حاجة في الشارع و نحافظ علي بلدنا نضيفة..

اتربينا نقبل ايد الاب و الام، و نحترم الصغير قبل الكبير ..

اتربينا نحترم كل الناس ، نحترم كل الأديان.
. ننحني قدام المدرس و رجل الدين ابونا أو عم الشيخ،
نحترم جرس الكنيسة و ادان الجامع ..

اتعلمنا نسكت وقت الآدان بكل أدب، و نشارك كل حبايبنا اعيادهم..
اتربينا نحب بلدنا و كبير بلدنا، و نحيي علمها و نقول نشيدها و نحمي ارضها ..
اتربينا نحب شغلنا ، و نديه كل امانة، و ندي المحتاج و احنا ما نعرفوش كفاية انه طلب ..

اتعلمنا نهني الكل بالعيد ، مسلم قبل مسيحي ،
و نجامل الكل في الحزن و الفرح ..
و اتعلمنا نراعي حرمة الجيران، و نوطي اي صوت عالي علشان ما نزعجوش..

اتعلمنا نبتسم في وش اي حد ، و نعامل الكل بأدب و احترام ،
و أن مفيش حد احسن من حد ، عامل نضافة ، بواب ، سواق، الغفير تحترمه زي الغفير ..

و دلوقتي بيقولوا لنا انتم اتربيتم غلط، الدنيا ما تمشيش بالمباديء و الأخلاق دي،

الدنيا عاوزة الحلانجي و النصاب و الفهلوي و البلطجي و الصايع و قليل الأدب..

اسف جدا ..

مش ح نعرف نبقي إلا اللي اتربينا عليه ، أخلاقنا دي جزء مننا و من ربنا اللي غرسها فينا ..

يقولوا علينا اللي يقولوه ، يتريقوا ، يستقلوا بينا ،
لكن احنا مش ح نقدر نكون إلا كده ،
و كفاية أن ضميرنا فرحان و احترامنا لنفسنا رافع راسنا ،
و احترام الناس لينا مكبرنا ..