[walaa farouk]

حتي في الاكل أخلاقك تنور..

١-خليك عفيف ، لو في عزومة اطلب علي قدك و اقل من اللازم حتي
، علشان ما تكلفش الناس، و الدنيا عمالة تغلي ..

٢-خليك خفيف ، حاسب علي طلباتك و اتفق مع الناس علي كده علشان ما تتقلش علي حد ..

٣-خليك كريم، أغرف لغيرك الأول، و اعزم علي اللي حواليك قبل نفسك ،
خليهم يحسوا انك مهتم بيهم قبل نفسك..

٤-خليك حريص، و حاسب من "الطفاسة" حتي لو بهزار ، و ده موضوع كبير :
-مثلا اوعي تاخد أكبر نصيب أو تغرف بدون وعي و كأن الأكل ح يخلص و ح تقوم مجاعة في العالم !!
-اغرف علي قدك و خلص الطبق، و ابقي اغرف تاني لو كنت جعان !!
-أوعي "تزلط" أو تاكل و تشرب "بصوت" (انت اكيد عارفه) ..
-استخدم الشوكة و السكينة كل ما تقدر ،
الاكل بالايد افضل يبقي في بيتك أو لو عيلتك متعودة علي كده ..
-اوعي تنقي اكبر نصيب (محبة النصيب الأكبر رذيلة) ، لو قدامك جزء أكبر اعزم بيه و خد الاقل ..
-ما تبصش لحد و هو بياكل و لا تعلق عليه أو تتريق (ما يصحش)
-الاكل دايما فرصة للحكاوي : سيب صاحب العزومة أو كبير القاعدة يحكي
و ما تاكلش الجو و تسيطر علي القاعدة أو تستظرف علشان تلفت النظر .
. لو ضروري شارك بلطف و ادب ..

علي فكرة الناس بتلاحظك و انت بتاكل، و انطباعاتهم عنك بيسجلوها في عقلهم من غير ما تعرف!!

أخلاقيات الاكل رقي انساني كتير بننساه، لكن في الاخر بيخليك تحترم نفسك
و بيقدمك للناس غالي و محترم و مهذب ..