[walaa farouk]

ربنا يكفيك شر المستخبي، دعوة مبدعة من اهالينا سمعناها من طفولتنا ..

ده اللي حصل لشمشون و هو رايح يتقدم لعروسته
، فطلع له من وسط الكروم أسد !! (قضاة ١٤) .. في الحال روح الله حل عليه و شقه نصين ..

نفس "المستخبى" حصل مع التلاميذ لما في ليلة هادية قامت الريح عليهم من حيث لا يتوقعوا،
جالهم السيد المسيح حتي من غير ما يطلبوا ماشي علي المية و أنقذهم ..(متي ١٤)

هو بعينه المستخبي لما فجأة بطرس في ليلة اتقبض عليه و اتسجن
، و جاله الملاك يفتح له باب السجن و خرجه منه (اعمال ١٢) ،
و زيه بولس لما اتسجن فجأة ، و في نفس الليلة قامت زلزلة فتحت له السجن و خرج بسلام (اعمال ١٦) ..

كل يوم بيمر علينا فيه المستخبي اللي مش عاملين له حساب :
مرض مفاجيء، عطل طاريء في سيارة ،
أزمة مع شخص حبيب أو غريب من غير مقدمات و لسبب غير مفهوم ،
خسارة مالية مفاجأة، حد في العيلة أو الأصدقاء تعب ..

المستخبي عليك معروف عند ربنا من قبل ما يحصلك و عامله حساب كويس
.. زي الأستاذ، قبل ما بيبعت الإمتحان للكونترول بيبعت معاه نموذج الإجابة النموذجية..

و ده المعني الخالد اللي في الآية "في يوم خوفي، أنا عليك أتكل" (مزمور ٥٦ : ٣)
. يعني فيه "يوم خوف" و ساعتها ح اتكل علي إلهي ..

بعد شوية داود اتجرأ اكتر و قال : "الرب نوري وخلاصي، ممن أخاف؟ " (مزمور ٢٧ : ١)
، يعني مش ح استني يوم الخوف و اتكل عليك ، ده انا مش ح اخاف اصلا !!

اوعي تخاف من اللي ممكن و لا اللي انت مش عارفه لان الهك حاطط الحل قبل المشكلة..

و ربنا يكفيك شر المستخبي ..