[walaa farouk]

اسمحيلى_يا_إكلسيّا
اسمحيلى اسالك ؟ وردى عليا ؟
ليه عملتى مكتبة ونادى وكورال. وكشافة وحضانة ومهرجان. ومستوصف وكافيتيريا ؟
لما كنيستنا عملت #المكتبة كان هدفها انك تقتنى كتب ومبيعات روحية
تفيدك لخلاص نفسك ( وماكنتش تعرف ان الموضوع هايتحول لتجارة ومكسب وخسارة
وخدام يتخانقوا مين يبيع ومين يشترى ومين ينضف ومين ومين ومين )
ولما الكنيسة عملت #النادى كان هدفها ان ولادها يلعبوا ف حضنها
ومايخرجوش يلعبوا فى اوساط غير مضمونة اخلاقياً
( ولم تكن تعلم ان النادى هايتحول لمشادات وتصارع على الالعاب ومشاحنات غير لائقة )
ولما الكنيسة عملت #الكانتين كان هدفها ان ولادها ف وسط خدمتهم او لعبهم او انشطتهم يلاقوا حاجة ياكلوها ويشربوها بدل مايخوروا فى خدمتهم او يبحثوا خارج الكنيسة عن مايطلبونه
( ولم يكن ف الحسبان ان الموضوع هايتطور لسوبر ماركت كبير داخل الكنيسة
به المحاسب ومدير البيع والكاشير )
ولما الكنيسة عملت #الكورال كان هدفها تشجيع ولادها وبناتها
وتنمية مواهبهم وبدل مايحفظوا اغانى عالمية يحفظوا ترانيم جميلة والحان معزية
يصلوا بيها وتقودهم لخلاص نفسهم ( بس للاسف اتحول الموضوع ل هانلبس ايه
وهانعرض امتى ومين هايقول صولو وانا صوتى احلى منها
وانا اللى اقول ف الحفلة الكبيرة وكلام كتيييييير ضيع هدف الكورال )
ولما الكنيسة عملت #الكشافة كان هدفها تفريغ طاقات الفتيان والفتيات
فى انشطة روحية وحركية ودراسية وعمل خلايا عمل من اصغر طفل
لاكبر شاب للعمل الكشفى داخل الكنيسة
( ومع مرور الوقت تتحول الموضوع الى اوامر ونواهى صماء بدون فهم وبدون روح
- ويدخل روح الذات والكبرياء بين الرتب الكبيرة والصغيرة وروح حب الظهور
والاهتمام بالشكل الخارجى بدون جوهر داخلى )
ولما الكنيسة عملت #الحضانة كان هدفها تربية النشئ الصغنن فى حضنها
ويشربوا الايمان الصحيح ويتعلموا كل حاجة حلوة بعيد عن احضان العالم
( وعمرها ماعملت حسابها ان المشرف والامهات والميسات والدادة والباص
والكتب واليونيفورم والاشتراكات - مش هايتفقوا مع بعض ابداً وتيجى ف الآخر على دماغ الاطفال )
ولما الكنيسة عملت #المستوصف كان هدفها تريّح ولادها من امراضهم الجسدية باسعار رمزية
وتخفف عنهم الامهم بمعاملة رقيقة و بدون اعباء مادية
( ولكن للاسف تحول المستوصف لمؤسسة كبيرة وبزنس ضخم
أرهق الناس اكثر مادياً بمعاملة اكثر جفاءاً )
ولما الكنيسة عملت #المهرجان كان هدفها توصيل كلمة ربنا من كتاب مقدس والحان
وقبطى ومحفوظات وتسلية للمحبة لاصغر قرية ف مصر وحتى اكبر ولاية ف امريكا
( وماكنتش تعرف ان الموضوع هايتحول لمنافسة شرسة بين الكنائس
وغياب المحبة وزرع الحقد والغيرة بين الخدام )
وهكذا بعدما عرفنا الاجابة يا أحبائى ( المسئولين والقائمين على الخدمات ) ؟
لماذا نحوّل كل عمل صالح وروحى وبنَّاء داخل الكنيسة الى اهداف اخرى غير روحية بالمرة ؟ لماذا نحوّل الروحيات لماديات - والنور الى ظلمة - والخير الى شر - والحلو الى مر ؟
لازم تعرفوا يا احبائى انه ليس للكنيسة اى هدف آخر سوى خلاص النفوس
فلا تحولوا هذا الهدف الى اهداف اخرى عالمية !
#نائلين_غاية_ايمانكم_خلاص_النفوس ( ١بط ١ : ٩ )