[walaa farouk]

الراجل بيموت حرفياً كل يوم ، بيشتغل الليل قبل النهار
علشان يوفر لمراته و ولاده حياة كريمة ،
و كل اللي بس مستنيه كلمة حلوة و كلمتين تقدير من مراته تخليه ينسي كل لحظة تعب
"البيت مفتوح بحسك، ربنا يقويك و يقدرني أسعدك " .. دول بالدنيا عنده ..

و الست من طلعة اليوم شقا و عرق و تعب مع البيت و الولاد
، ما بين نضافة و طبخ و غسيل و مذاكرة .. واقفة علي رجليها ما بتهداش
، و ضهرها ح يموتها من المجهود، و عينيها منفخة من قلة النوم ..
كل اللي هي مستنياه كلمة حلوة علي كلمتين تقدير من جوزها وولادها
"ربنا يخليكي لينا ، تعبك في عينينا، منورة البيت " ..
و بسبب حبة حب من دول مستعدة تشتغل اضعاف و اضعاف ..

و الولاد برضه بيموتوا روحهم في المذاكرة
علشان يسمعوا من بابا و ماما بس كلمتين تشجيع
"انتم نور عيني، انتم اشطر ولاد في الدنيا "
، و بسبب الكلام الحلو ده بيعملوا المستحيل علشان يسعدونا و يشرفونا ..

كده برضه الصديق مع صاحبه و الخادم مع أمين خدمته
و الموظف مع مديره و الدكتور مع المرضى
و الاستاذ مع تلاميذه و انت مع اي واحد بتقابله زي الموظف
، السواق ، العامل ، البواب .. حرفيا كل الناس مع كل الناس !!

ما تبخلوش بالكلام الحلو المسكر لبعض ،
الكلام ما بيكلفناش حاجة لكن بيفرق في حياة الناس ..

الكلام الحلو وطن للي مالوش وطن ، و مية جميلة و مروية للنفس
زي ما قال الكتاب "مياه باردة لنفس عطشانة، الخبر الطيب من أرض بعيدة (أمثال ٢٥ : ٢٥)"