[walaa farouk]

جدتي الله يرحمها
كانت دايما تقوللي
(المحبه أبخات فمتوجعيش دماغك)
الحقيقه بقي اني ماكنتش بفهم الجمله دي وقتها
وكنت بقولها يعني ايه المحبه ابخات
ما لو انا كويسه ومش بعمل حاجه وحشه لحد ليه يكرهني
ولو حد بيعملي حاجات كويسه ليه مااحبوش
الموضوع مش اختراع يعني😎😎

وللاسف كل مااكبر
اكتشف انها عندها حق
ايوا فعلا وحقا

المحبه ابخات

لان ممكن نبقي بنبذل مجهود رهيب في علاقه
وبنحاول نرضي اللي ادامنا ونعمله اللي بيحبه
لكن هو مش شايف فينا غير اننا اشرار وكل تصرف منا جواه سوء نيه
ببساطه
مش بيحبنا
هو مش شايف غير عيوبنا
فمهما عملنا حاجات كويسه هو بيفسرها من زاويه الشر
يعني بنعمل حاجه تفرحه
يفسرها اننا بنغيظه
نحاول نبسطه يفتكر اننا بنعللي عليه عشان نبان احسن منه
واي تصرف اي تصرف
هو مش شايف الحلو اللي فيه

عشان ببساطه المحبه ابخات

واحنا كمان
بنلاقي نفسنا بنحب ناس ماتتحبش اساسااا 😏😏
بس بنحبها وبنغفرلها ونسامحها علي اي حاجه مهما حصلت
وبنشوف كل حاجه بتعملها علي انها حسن نيه
وهبل
وهو سوء تصرف لحظي مش اكتر 🙄

عشان المحبه ابخات

لما قالو زمان
حبيبك يمضغلك الزلط وعدوك يتمنالك الغلط
ماكذبوش

عشان المحبه ابخات علي رأي جدتي الله يرحمها
القلوب مش بايدينا
هي كان عندها حق
لما قالتلي ماتوجعيش دماغك
يعني ماتبذليش مجهود مضاعف لشخص مش شايف فيكي الحلو
لانه عمره ماحيشوفه

عاملي الناس بطبيعتك
ماتفكريش بيحبك ولا بيكرهك
المهم انتي ماتكرهيش حد وتدخلي السواد في قلبك من غير ماتحسي

وخدي بالك من نفسك في الاول