[walaa farouk]

شخصية فيس بوكية

شخصية اعتبارية تتميز ب ١٥ صفة ..

١-بيلبس هالة من الحكمة التي لا تتناسب لا مع عمره و لا خبرته و لا شخصيته..

٢-بينقل مقولات مأثورة من هنا و هناك ليوحي للناس انه عليم و فهيم و سيد العقلاء..

٣-يقتبس أقوال و صور (كلمة مهذبة للسرقة) و لا ينسبها لأصحابها علشان يزود اللايكات و الفيوارز..

٤-بيخبي عيوبه ورا كلامه ، و يقعد يدي نصايح ما بيعملش منها حرف ..
المهم يبان انه صاحب المشورة الصائبة دايما ..

٥-مش لاقي حد يسمعه فبيرمي مضايقته علي النت
علشان ياخد شوية تعاطف من الناس و يحس ان هو مظلوم و مغلوب و عاوز اللي يقوله انت صح ..

٦-مشاعره سطحية: يجري يرميها علي الفيس من غير ما يعالجها أو يكلم حد فيها و يواجهها..

٧-عنده نظرية "خالف تعرف" ، كل الناس يعجبها بوست مثلا و هو يخش يحط التاتش بتاعه

و يشرّك الكلام علشان يبقي هو اللي جاب التايهة !!

٨-عنده رغبة في تحقير الناس و بالذات الأسماء المعروفة، فيلف عليهم
و يخش يهينهم(لانهم في نظره ما بيفهموش و هو بس اللي بيفهم) ..

غيار و حقود و بيطلع غله و حسده فيهم ..

٩-يوحي لك أن عنده اللي مش عند حد ، و عاوز يبقي دايما محط الأنظار..

١٠-بيسرق اسماء المعروفين و يعمل لهم صفحات وهمية و يلم عليهم ناس كتير ..

١١-متعته يعمل حسابات كتير يخبي وراها شخصيته، و يطلع يشتم و يجري..

و لو اتعمل بلوك يقوم الدنيا علي اللي عمل كده ؛

و كأن المطلوب يشتم و نسيبه و نرحب به !!

١٢- ما عندوش حاجة يعملها مفيدة بجد فيضيع كل وقته بالساعات بيقلب من صفحة لصفحة ،

و من فيديو لفيديو يبتدي في مصر الصبح بالليل يجيبوه من "ليبيا" 😄

١٣-ما بيحترمش اجتماع و لا ناس و لا زيارة ، لازق الفيس في ايده ما لوش صاحب غيره،

حتي و هو بيعدي الشارع .. لو في العناية المركزة مغمي عليه يفوق يمسكه و يغمي عليه تاني 😊

١٤-ناسي بيته و عيلته و حتي ربه : دينه و معبده بقي الفيس..

حتي في وسط الصلاة يقف يقلب يشوف مين باعت له رسالة !!

١٥-بقي عامل له زي "السكاتة" او "الرضعة: او "المخدرات"
، لو منعتها عنه يبقي عصبي و خلقي و بيبرم و يدور لغاية ما يلاقيه ، زي المدمن بالظبط..