[Rena Jesus]

"‏أنا مستحيل أتنافس مع أي شخص عاوز ياخذ مني حبيب او صديق
بالعكس بفضي ليه المكان لأني مؤمنة
بمقولة اللي عاوزك مش هيحتار فيك."

طول عمري لحد إنهاردة بختلف مع أمي في الموضوع ده بالذات..
هي بتشوف إنك لازم ت fight عشان تحافظ على اللي بتحبه إن أي حد يخطفه منك..
وأنا بشوف إن اللي بحبه ده لو سمح لحد يخطفه أصلاً يبقى ألف مبروك عليها،
هلفهولها وعليه بوسة وفيونكة

ممكن أحارب لآخر نَفَس ظروف محطوطين فيها إحنا الإتنين (فلوس، بُعد، مجتمع، عيلة..) عشان علاقتي بيه تنجح..
أحارب لآخر نَفَس عشان أراضيه لو زعلته..
عشان على أد ما أقدر ما أقصرش في حقه..
عشان أحسسه أد إيه بحبه وأد إيه هو مهم بالنسبة لي..
إنما يوم أما أحس إنه محتار بيني وبين حد تاني،
بريحه من الحيرة وبسيبه للحد تاني في لحظتها وبدون أي تردد

مابفهمش أصلاً يعني إيه هو بيقارن ومتردد وأنا المفروض أخليه يختارني !
وأكتر جملة كرهتها في مسلسل Grey’s Anatomy،
أما قعدت تقوله pick me, choose me, love me وهو محتار بينها وبين مراته
كنت هكسر الشاشة وادخل اجيبها من شعرها وأقولها إيه اللي بتقوليه ده ياموكوسة

طبعاً في ناس هتختلف معايا اند إيتس أوك..
مش لازم يبقى حد صح وحد غلط، كل واحد له طريقة بتريّحه..
وأكيد ماما هتحبكم أوي