[walaa farouk]

مش عارفة هي ثقافة مجتمع، ولا ثقافة بني آدم، من يومه وهو عايز يدارى،
خايف ومكسوف، مش بس خايف دا مرعوب وبيدور على حيطه يستخبى وراها دايما.
أصل آدم زمان لما غلط اتفاجئ من نفسه
، كان فاكر إنه مش هايغلط عمره. كان فاكر إنه كامل. وبرغم إنه شاف عريه ونقصه
، لكنه ماقدرش يقبل حقيقته، ما قدرش يقبل إنه إنسان ضعيف ومحدود وعاصي.
عشان كده فكر يستخبى.

عارفين؟ إحنا بنتكلم عن آدم، وبنستغرب من إللى عمله،
وكمان بنلومه! رغم إننا بنعمل كده كل يوم. عايشين مش قابلين نفوسنا، رافضين ضعفنا
، عايشين بنقول يا حيطه داريني. وبسبب كده بنلاقي كتير مننا تعب قوي،
ودخل في دوامة البحث عن الكمال، أو دوامة اليأس والاكتئاب،
أو حاجات تانية كتير، بنسمع عنها. زي مثلا لما قرينا عن إللى انتحر عشان ماعرفش يأّكل أولاده
هو ماقدرش يقبل حقيقة ضعفه ومحدوديته، ما قدرش يفتكر إنه بني آدم
ومش "سوبر آدم" ولما نسي الحقيقة دي، خلف 9 عيال، وفي الآخر موتهم
وانتحر وراهم وكانت الحيطة إللى ادارى وراها هي الموت، أو الهروب بالموت.
يا ترى انهاردا أنا لغاية فين قابل نفسي وضعفي، لغاية فين شايف قصوري ومتصالح معاه؟
ولا لسه باستجدي عطف الآخرين، وبادّارى ورا حيطة الاعتمادية!
وهي الحيطة إللى بتفصلني عن نفسي.